पिंपरी : पिंपरी-चिंचवड शहरात एक धक्कादायक घटना घडली आहे. भाड्याने घेण्याकरिता खोली पहाण्यासाठी आलेल्यांना दारुच्या नशेत शिवीगाळ केल्याने झालेल्या झटापटीत चौघांनी लाथाबुक्क्यांनी जबर मारहाण केल्याने तरुणाचा मृत्यु झाला आहे. या घटनेनंतर तब्बल पाच दिवसांनी चौघांवर खुनाचा गुन्हा दाखल करण्यात आला आहे. सतिश अर्जुन देडगे (वय ३१, रा. साळुंखे वस्ती, माण, ता. मुळशी) असे खून झालेल्या व्यक्तीचे नाव आहे.
हरी गणपत वाघमोडे (वय-३३, रा. गुजरनगर, थेरगाव), अविनाश रमेश गव्हाळे (वय २८, रा. लक्ष्मणनगर, थेरगाव), विपुल सुरेश कुंभार (वय-२७, रा. लक्ष्मणनगर, थेरगाव), संदीप कांतीलाल शेडगे (रा. सदगुरु कॉलनी, वाकड) अशी गुन्हा दाखल झालेल्यांची नावे आहेत.
पोलिसांनी दिलेल्या माहितीनुसार, सतिश देडगे हा त्याच्या राहत्या घरी दारु पिऊन आला होता. त्यावेळी घरमालक यांच्या ओळखीचे आकाश बापु हेगडे यास खोली भाड्याने पाहिजे होती. ती खोली पाहण्यासाठी त्याचे चौघे मित्र त्या ठिकाणी आले होते. सतिश देडगे याची रुम खाली होणार असल्याने घरमालक यांनी त्याची खोली बघण्यासाठी हरी वाघमोडे व त्याच्या मित्रांना तेथे पाठविले होते. त्यावेळी मृत देडगे हा त्याचे खोलीत दारु पिऊन पडला होता. ते खोली बघत असताना सतिश याने हरी व त्याचे मित्रांना शिवीगाळ करण्यास सुरुवात केली.
त्यावेळी त्यांनी शिव्या देऊ नकोस, खोली बघायला आलो आहे, असे सांगितले. तरीही तो शिवीगाळ करुन त्यांच्या अंगावर मारायला धावून गेला. त्यावेळी त्यांच्याशी झटापटी करु लागला. त्यांनी सतिश देडगे याला समजावण्याचा प्रयत्न केला. मात्र, तो ऐकत नसल्याने त्यांनी सर्वांनी मिळून सतिश याला लाथाबुक्क्यांनी बेदम मारहाण केली. तसेच बाजूला पडलेल्या लाकडी प्लायच्या पट्टीने मारहाण केली. या मारहाणीत सतीश जाग्यावरच कोसळला.
दरम्यान मारहाणीत निपचित पडलेल्या सतीशला नागरिकांनी रुग्णालयात दाखल केले असता डॉक्टरांनी तपासणीपूर्वीच मृत्यु झाल्याचे घोषित केले. हिंजवडी पोलिसांनी अकस्मात मृत्युची नोंद करुन तपास सुरु केला आहे. तपासामध्ये खोली पहाण्यासाठी आलेल्यांकडून हा खुन झाल्याचे निष्पन्न झाल्यानंतर गुन्हा दाखल करण्यात आला असल्याचे सहायक पोलीस निरीक्षक सोमनाथ पांचाळ यांनी सांगितले.
