मुंबई : राष्ट्रवादीचे नेते बाबा सिद्धिकी यांच्या हत्येनंतर आता देशभरात गँगस्टर लॉरेन्स बिश्नोईचं नाव चर्चेत आहे. अशातच लॉरेन्स बिश्नोई याला आता थेट महाराष्ट्र विधानसभा निवडणूक लढवण्याची ऑफर आली आहे.
महाराष्ट्रात सध्या विधानसभा निवडणुकांचे पडघम वाजले आहेत. येत्या 20 नोव्हेंबरला विधानसभा निवडणुका पार पडणार आहेत. या निवडणुकांसाठी सर्वच पक्ष सध्या उमेदवारी यादी घोषित करण्याच्या तयारीत आहेत. त्यातच आता वांद्रे पूर्व विधानसभा मधून आमदार झिशान सिद्दीकी विरोधात लढवण्यासाठी उत्तर भारतीय विकास सेनेकडून लॉरेन्स बिश्नोईला ऑफर देण्यात आली आहे.
कोणत्या पक्षाने दिली लॉरेन्स बिश्नोईला ऑफर?
उत्तर भारतीय विकास सेना हा पक्ष निवडणूक आयोग आणि महाराष्ट्र राज्य निवडणूक आयोगात नोंदणीकृत पक्ष आहे. उत्तर भारतीय विकास सेनेचे राष्ट्रीय अध्यक्ष सुनील शुक्ला यांनी लॉरेन्स बिश्नोईला पत्र लिहून महाराष्ट्रातील विधानसभा निवडणूक लढवण्याची मागणी केली आहे. उत्तर भारतीय विकास सेनेकडून गुजरात येथील साबरमती जेल प्रशासनाला निवेदन लिहून मागणी करण्यात आली आहे.
उत्तर भारतीय विकास सेनेकडून लॉरेन्स बिश्नोईला पूर्ण पाठिंबा आहे. आगामी विधानसभा निवडणूक लढवण्यासाठी लॉरेन्स बिश्नोईला ऑफर देण्यात आली आहे. याशिवाय बाबा सिद्दीकी हे देशभक्त नाहीत तर लॉरेन्स बिश्नोई हे देशभक्त आहेत. तर लॉरेन्स बिश्नोई हा उत्तर भारतीय समाजाचा आहे. त्यामुळे आम्हाला बिश्नोईमध्ये शहीद भगत सिंग दिसतो. त्यामुळे लॉरेन्स बिश्नोईने निवडणूक लढवण्यासंदर्भात विचार करावा, अशी विनंती त्यांनी केली आहे.
