पुणे : पुणे शहरासह जिल्ह्यात अत्याचाराच्या घटनांमध्ये वाढ होताना दिसत आहे. शाळेतील महिलेला अश्लिल शेरेबाजी करत मिठी मारुन शारीरीक सुखाची मागणी करुन विनयभंग केल्याचा धक्कादायक प्रकार समोर आला आहे. हा प्रकार जे एन पेटिट टेक्निकल हायस्कुल परिसर व शिक्रापूर येथील शिवतारा पर्यटन स्थळ येथे ५ सप्टेंबर २०२३ ते ९ जुलै २०२४ या काळात घडला आहे.
याबाबत एका महिलेने कोरेगाव पार्क पोलीस ठाण्यात फिर्याद दिली आहे. त्यावरून शाळेच्या प्रशासकाविरुद्ध कोरेगाव पार्क पोलिसांनी गुन्हा दाखल केला आहे. प्रशांत पुष्टी (वय-५२) असे या शाळेच्या प्रशासकाचे नाव आहे.
पोलिसांनी दिलेल्या माहितीनुसार, आरोपी प्रशांत पुष्टी हा शाळेचा प्रशासक आहे. त्याने फिर्यादीला अश्लिल शेरेबाजी करुन त्यांना मिठी मारली. फिर्यादी यांच्याकडे शारीरीक सुखाची मागणी केली. याबाबत फिर्यादी यांनी नापसंती व्यक्त केली.
त्यानंतर या घडलेल्या प्रकाराबाबत कोणाला काही सांगितल्यास नोकरीवरुन काढण्याची व बघुन घेण्याची धमकी दिल्याचे फिर्यादीत म्हटले आहे. दरम्यान, शरीर सुखाबाबत बोलून फिर्यादी यांचा विनयभंग केल्याप्रकरणी आरोपीवर गुन्हा दाखल करण्यात आला आहे. या घटनेचा अधिकचा तपास सहायक फौजदार अ‍ॅन्थोनी करत आहेत.
