मुंबई : सध्या सर्वत्र गणेशोत्सवाचा उत्साह पाहायला मिळत आहे. पाच दिवसांच्या गणरायाचे विसर्जन करण्यात आले असून 10 दिवसांच्या गणरायाचे विसर्जन अनंत चतुर्दशीला केले जाईल. अनेक ठिकाणी भाविक बाप्पाच्या दर्शनाला जात आहेत. सेलिब्रिटीही इतरांच्या घरी जाऊन बाप्पाचे आशीर्वाद घेत आहेत. अशातच आता मुख्यमंत्री एकनाथ शिंदेंच्या घरी अभिनेते सलमान खान यांनी बाप्पाच्या दर्शनासाठी हजेरी लावली आहे.
महाराष्ट्राचे मुख्यमंत्री एकनाथ शिंदे यांनी सलमान खानसोबतचे फोटो अधिकृत इन्स्टाग्राम अकाउंटवर शेअर करत कॅप्शन लिहिलं आहे की, ‘सुप्रसिद्ध अभिनेते सलमान खान यांनी काल वर्षा निवासस्थानी उपस्थित राहून श्री गणेशाचे दर्शन घेतले. यावेळी त्यांना शाल, श्रीफळ, पुष्पगुच्छ आणि श्री गणेशाची मूर्ती देऊन सन्मानित केले. तसेच याप्रसंगी त्यांच्या शुभहस्ते श्री गणेशाची आरती करण्यात आली. यावेळी माझा पुत्र खासदार डॉ.श्रीकांत शिंदे, स्नुषा वृषाली आणि इतर मान्यवर उपस्थित होते.’
मुख्यमंत्री एकनाथ शिंदे यांनी शेअर केलेल्या फोटोमध्ये सलमान गणपती बाप्पाच्या मूर्तीसमोर हात जोडून नमस्कार करताना दिसत आहे. दुसऱ्या फोटोमध्ये मुख्यमंत्री एकनाथ शिंदे यांनी सलमान खानला शाल, श्रीफळ, पुष्पगुच्छ, आणि गणपती बाप्पाची मूर्ती देऊन सन्मानित केलं. त्याचबरोबर सलमान खानची बहीण अर्पिता खान हिला सुद्धा सन्मानित करण्यात आलं.
