अक्षय टेमगिरे
रांजणगाव गणपती : शिरुर तालूक्यातील करंदी येथील पेट्रोल पंपमध्ये उभ्या असलेल्या एका ट्रकचे चार टायर व बॅटरी अज्ञात चोरट्यांनी चोरून नेल्याची घटना घडली आहे. याप्रकरणी शिक्रापूर पोलीस स्टेशन येथे अज्ञात चोरट्यांवर गुन्हा दाखल करण्यात आला आहे. याबाबत सतीश पांडूरंग पऱ्हाड (वय ३४ वर्षे रा. पऱ्हाडवाडी केंदूर, ता. शिरुर, जि. पुणे) यांनी शिक्रापूर पोलीस स्टेशन येथे फिर्याद दिली आहे.
याबाबत पोलिसांनी दिलेल्या माहितीनुसार, करंदी ता. शिरुर येथील ईस्सार पेट्रोल पंप येथे पंपातील साहित्य घेऊन आलेला एम एच ०४ जि सि ३६०९ हा ट्रक उभा होता. यावेळी सकाळच्या सुमारास ट्रकच्या ट्रान्सपोर्टचे कर्मचारी सतीश पऱ्हाड हे ट्रक जवळ गेले असता, त्यांना ट्रकच्या पाठीमागील चार टायर नसल्याचे दिसल्याने त्यांनी ट्रकची पाहणी केली असता ट्रकची बॅटरी आणि चार टायर अज्ञात चोरट्यांनी चोरुन नेल्याचे निदर्शनास आले.
याबाबत सतीश पऱ्हाड यांनी शिक्रापूर पोलीस स्टेशन येथे फिर्याद दिली. त्यावरून पोलिसांनी अज्ञात चोरट्यावर गुन्हा दाखल केला असून पुढील तपास पोलीस निरीक्षक दिपरतन गायकवाड यांच्या मार्गदर्शनाखाली पोलीस हवालदार प्रशांत हे करत आहेत.
