पुणे : पुणे जिल्ह्यातील आंबेगाव तालुक्यातील भीमाशंकर साखर कारखान्याच्या वार्षिक सर्वसाधारण सभेचे आयोजन करण्यात आले होते. या सभेत शरद पवार आणि अजित पवार गटाचे कार्यकर्ते सहकार मंत्री दिलीप वळसे पाटील यांच्यासमोर एकमेकांत भिडल्याने एकच राडा झाला. या सभेत तब्बल दोन तास गदारोळ सुरू होता. कारखान्याच्या सर्वसाधारण सभेचं निमित्त असले, तरी आगामी विधानसभा निवडणुकीची झालर सुद्धा या सभेला आली होती. त्यामुळे दोन्हीकडील कार्यकर्ते आक्रमक झाले होते. दरम्यान, पोलिसांनी तणाव वाढू न देता हस्तक्षेप केल्यानंतर कारखान्याची सभा सुरु करण्यात आली.
मंत्री दिलीप वळसे पाटील यांच्या विरोधात विधानसभा लढण्यास इच्छुक असणारे शरद पवार गटाचे देवदत्त निकम या दोघांचे कार्यकर्ते एकमेंकाना भिडले. आम्हाला बसू दिलं नाही, मंचावर येऊ दिलं नाही, बैठकीत दिलीप वळसे पाटलांनी स्वतःचा प्रचार केला, हे सगळं घडवून आणण्यासाठी वळसे पाटलांनी गुंड घेऊन आल्याचा आरोप देवदत्त निकम यांनी केला आहे. या मुद्द्यांवरून दिलीप वळसे पाटील आणि देवदत्त निकम यांचे कार्यकर्त आक्रमक झाले होते. तसेच खुर्च्या नाचवत हिणवत होते. यावेळी मंत्री वळसे पाटील यांनी शांततेचं आवाहन केलं, मात्र वेगवेगळ्या कारणांवरून राडा सुरूच होता.
पोलिसांनी देवदत्त निकमांना केली बाहेर जाण्याची विनंती
दरम्यान, या सर्व प्रकारानंतर शेवटी पोलिसांनी मध्यस्थी करत देवदत्त निकमांना बाहेर जाण्याची विनंती केली. यानंतर देवदत्त निकम यांनी आम्हाला सभेतून हकलण्यासाठी गुंड आणल्याचा आरोप केला. मात्र, हे आरोप अजित पवार गटाने फेटाळून लावले. विनाकारण राजकीय रंग देऊन स्वतःची पोळी भाजण्याचे प्रयत्न निकाम करत आहेत असा पलटवार अजित पवार गटाकडून करण्यात आला. देशातील सर्वोत्तम मानल्या जाणाऱ्या भीमाशंकर कारखान्याच्या वार्षिक बैठकीत हा गदारोळ करून काय साध्य केलं. उलट कारखाना बदनाम करण्याचे प्रयत्न केला, असं अजित पवार गटाचे नेते शिवाजी आढळराव पाटील म्हणाले.
