भरधाव कारने दुचाकी स्वराला मागून जोरदार धडक दिल्याने युवकाचा मृत्यू; रांजणगाव येथील घटना

-अक्षय टेमगिरे

रांजणगाव गणपती : शिरुर ता. रांजणगाव गणपती येथील पुणे नगर महामार्गावर भरधाव चारचाकी वाहनाने दुचाकीला जोरदार धडक दिली. यात दुचाकीस्वाराचा मृत्यू झाला. रांजणगाव एमआयडीसी पोलीस स्टेशन येथे अज्ञात कार चालकावर गुन्हा दाखल करण्यात आला आहे.

या अपघातात राहुल बाबासाहेब काशीकर (वय-24 वर्षे सध्या रा. रांजणगाव गणपती ता. शिरुर जि. पुणे मूळ रा. उंबरी ता. केज जि. बीड) या युवकाचा मृत्यू झाला.

याबाबत अमोल बाबासाहेब काशीकर (वय 30 वर्षे सध्या रा. रांजणगाव गणपती ता. शिरुर जि. पुणे मूळ रा. उंबरी ता. केज जि. बीड) यांनी रांजणगाव एमआयडीसी पोलीस स्टेशन येथे फिर्याद दिली आहे.

याबाबत रांजणगाव पोलिसांनी दिलेली माहिती पुढील प्रमाणे, रांजणगाव गणपती ता. शिरुर येथील पुणे नगर महामार्गावरून राहुल काशीकर हा युवक त्याच्या ताब्यातील दुचाकी हून चाललेला असताना पाठीमागून भरधाव वेगाने आलेल्या एम एच 14 जि यु 6155 या कारची राहुलच्या दुचाकीला धडक बसली. यावेळी राहुल रस्त्यावर जोरदार पडून गंभीर जखमी होऊन त्याचा मृत्यू झाला.

दरम्यान कार चालक घटना स्थळाहून पसार झाला. अमोल काशीकर यांच्या फिर्यादीवरून पोलिसांनी एम एच 14 जि यु 6155 या कारवरील अज्ञात चालकावर गुन्हा दाखल केला आहे. याप्रकरणी पुढील तपास पोलीस निरीक्षक महादेव वाघमोडे यांच्या मार्गदर्शनाखाली सहाय्यक पोलीस निरीक्षक मारुती पासलकर हे करत आहेत.