बारामती : बारामतीमधील मौजे संघवी पार्क येथे रात्रीच्या सुमारास एका व्यक्तीने दारू पिण्यासाठी पैसे देण्यास नकार दिल्याने दोन जणांनी शिवीगाळ करत बेदम मारहाण केल्याची घटना घडली आहे. हर्षद काकडे उर्फ बागवान (रा. आमराई, ता. बारामती, जि. पुणे), मुवाज पठान (मुळ रा. संघवी पार्क, बारामती, सध्या रा. पुणे) असे आरोपींचे नावे आहेत. याबाबत अनिकेत शिवदत्त गायकवाड (वय-22 वर्षे, रा. प्रतिभानगर इंदापुर रोड बारामती, ता. बारामती, जि. पुणे) यांनी फिर्याद दिली आहे.
याबाबत मिळालेल्या माहितीनुसार, अनिकेत शिवदत्त गायकवाड हे 15 ऑगस्ट रोजी रात्री 8 वाजण्याच्या सुमारास मौजे संघवी पार्क बारामती येथील महादेव मंदीराजवळ असतांना त्यांना आरोपी हर्षद काकडे उर्फ बागवान आणि मुवाज पठान यांनी अडवून त्यांच्याकडे दारू पिण्यासाठी पैशांची मागणी केली.
अनिकेत यांनी पैसे देण्यास नकार दिल्याने आरोपींनी त्यांना शिवीगाळ करत मारहाण केली. यामध्ये आरोपीनी चाकूने वार केले. या प्रकरणाबाबत अनिकेत गायकवाड यांनी दिलेल्या फिर्यादीवरून बारामती शहर पोलिसांनी गुन्हा दाखल केला आहे. पुढील तपास पोलीस करत आहेत.
