पुणे : अजित पवारांनी पुण्यातील वडगाव शेरीमधील नागरिकांच्या समस्या जाणून घेतल्या. वडगाव शेरी भागात नागरिकांच्या तक्रारीवरून उपमुख्यमंत्री आणि पुण्याचे पालकमंत्री अजित पवार यांनी थेट पुणे महापालिका आयुक्त राजेंद्र भोसले यांना फोन लावला. त्यामध्ये भटक्या कुत्र्यांच्या समस्येवर, कचऱ्याच्या समस्येवर तसेच दारू दुकानाच्या बाहेरच्या अतिक्रमणावर सूचना दिल्या आणि तातडीने कारवाई करण्याचे आदेश दिले.
दरम्यान, वडगाव शेरी भागातील समस्यांवर झालेल्या बैठकीत एका नागरिकाने त्यांच्या सोसायटीमध्ये भटक्या कुत्र्यांचा वावर असल्याने त्यांचा त्रास होतो, अशी तक्रार अजित पवार यांच्याकडे केली. त्यावर अजित पवारांनी थेट आयुक्तांना फोन केला आणि भटक्या कुत्र्यांसाठी वेगळी जागा निर्माण केली आहे. तिकडे सगळी कुत्री घेऊन जावीत आणि त्यांना इंजेक्शन द्यावं असे आदेश त्यांनी आयुक्तांना दिले. काहीजण या प्रश्नावर थेट कोर्टात जातात आणि कोर्टाकडून निकाल आणतात. सगळ्या प्राण्यांबद्दल प्रेम आदर आहे. पण त्या प्राण्यांचा त्रास लहान मुलांना होऊ नये. ही समस्या लवकर सोडवली पाहिजे असं अजित पवार यांनी सागितलं.
नेमक्या तक्रारी काय?
या बैठकीमध्ये अनेकांनी तक्रारी केल्या की कचऱ्याची गाडी येत नसून तसेच वॉर्ड अधिकारी जागेवर नसतो. त्यावर फोन केला तर समोरून सांगितलं जातं की त्यासाठी फंड्स नाहीत. लोकांच्या समस्या लवकर सुटण्यासाठी अशी काही व्यवस्था करा जेणेकरून तासाभरात त्यांचं समाधान होईल.
दारूच्या दुकानासमोर अंडी विकणारे आणि इतर काही विक्रेते बसत असतात, रस्त्यावरच त्यांनी अतिक्रमण केल्याने तिथून ये-जा करणाऱ्या महिलांना त्याचा त्रास होतो. असं एका महिलेने अजित पवारांना सांगितलं. त्यावर उतर देताना अजित पवार यांनी राजेंद्र भोसले यांना सांगितलं की, अतिक्रमणाबाबत काही वाईटपणा घ्यावा लागेल आणि ती तोडावी लागतील ते करा. पाच टक्के वाईटपणा घेतला तर 95 टक्के काम होतील. दारूची दुकानं झालीत, त्याच्याबाहेर अतिक्रमण झालं आहे, त्यावर कारवाई करा, असे आदेश अजित पवारांनी दिले आहे.
