शिक्रापूर : जातेगाव खुर्द (ता. शिरूर) येथे रात्री दहा वाजण्याच्या सुमारास दारूच्या नशेत एका युवकाची कार लहान पुलावरून वेळ नदीत बुडून वाहून जात असताना शिक्रापूर पोलिसांनी नागरिकांच्या मदतीने कार पाण्यातून बाहेर काढल्याने मद्यधुंद कारचालक थोडक्यात बचावला. याबाबत पोलीस शिपाई प्रतिक भाऊसाहेब जगताप (वय ३३ रा. शिक्रापूर ता. शिरूर जि. पुणे) यांनी शिक्रापूर पोलीस ठाण्यात फिर्याद दिल्याने पोलिसांनी कार चालक दादासाहेब सुरेश सातव (वय ३४ रा. जातेगाव खुर्द ता. शिरुर जि. पुणे मूळ रा. देवळाली ता. भूम जि. धाराशिव) याच्या विरुद्ध गुन्हा दाखल केला आहे.
वेळ नदीच्या लहान पुलाहून दादासाहेब सातव हा युवक मद्यधुंद अवस्थेत कार मधून चालेलला असताना अचानक त्याचा कारवरील ताबा सुटल्याने कार वेळ नदीवरील लहान पुलाहून नदीपात्रात कोसळली. दरम्यान पाण्याचा प्रवाह वेगाने असल्याने कार पाण्यातून वाहून जाऊ लागली. मात्र यावेळी कारचा दरवाजा उघडला गेल्याने कारचालक पाण्यातून पोहत कडेला आला.
