नवी दिल्ली : तुम्ही Poco कंपनीचा फोन वापरत असाल तर तुमच्यासाठी एक महत्त्वाची बातमी असणार आहे. Poco आपली जागतिक वेबसाईट बंद करणार आहे. Poco जो Xiaomi चा उप-ब्रँड आहे, त्याची जागतिक वेबसाईट po.co 31 डिसेंबर 2024 पासून बंद केली जाणार आहे.
Poco ची वेबसाईट जरी बंद होत असली तरी तुम्ही Poco फोन खरेदी करू शकणार नाही किंवा तुमच्याकडे आधीच Poco फोन असेल तर आता तुम्ही त्याची सर्व्हिसिंग करू शकणार नाही, असे काहीही होणार नाही. ही सर्व कामे पूर्वीप्रमाणेच सुरू राहणार आहेत. 31 डिसेंबरपासून Xiaomi ही सर्व कामं पाहणार आहे. Xiaomi ने आपल्या वेबसाईटवर एक नोटीस जारी केली आहे, ज्यामध्ये सांगितले आहे की ऑक्टोबरपासून सर्व Poco उत्पादने आणि सेवा Xiaomi च्या अधिकृत वेबसाईट mi.com/global मध्ये समाविष्ट केल्या जातील.
दरम्यान, या बदलाचा परिणाम ब्रिटन आणि फ्रान्ससह जगभरातील बाजारपेठांवर होणार आहे. असे जरी असले तरी कंपनीने अद्याप पोको इंडिया वेबसाईट बंद होणार की नाही याबाबत कोणतीही माहिती दिलेली नाही. Poco Store ॲप 31 डिसेंबरनंतर बंद होणार असले तरी, पोको उत्पादने मिळविण्यात आणि त्यांची सर्व्हिस मिळण्यात कोणतीही अडचण येणार नाही.
