सांगली: सांगली जिल्ह्यातून एक अत्यंत संतापजनक आणि हादरवून टाकणारी घटना समोर आली आहे. तासगाव शहरात एका १३ वर्षांच्या मतिमंद (गतिमंद) अल्पवयीन मुलीवर जिवे मारण्याची धमकी देऊन वारंवार अत्याचार केल्याचा प्रकार उघडकीस आला आहे. या घटनेमुळे सांगली जिल्ह्यात तीव्र संताप व्यक्त केला जात आहे.
पीडित मुलगी तासगाव शहरात तिच्या नातेवाईकांसोबत राहते. एप्रिल महिन्यात ती घरी असताना एका संशयिताने तिच्याशी ओळख निर्माण केली. तिला घराच्या मागे नेऊन जबरदस्ती करण्याचा प्रयत्न केला. मुलीने विरोध केल्यावर आरोपीने तिला ‘तुझ्या आईला मारून टाकेन’ अशी धमकी दिली, त्यामुळे घाबरलेल्या मुलीने हा अत्याचार मुकपणे सहन केला.
यानंतर आरोपीने बळाचा आणि धमक्यांचा वापर करून मतिमंद मुलीवर वारंवार अत्याचार केले. एवढेच नव्हे तर, आरोपीने तिला दुचाकीवरून गावाबाहेर फिरायला नेल्याचेही पीडितेच्या आईने पोलिसांना सांगितले.
हा सर्व प्रकार तब्बल चार महिने लपून राहिला. दरम्यान, मुलगी ४ महिन्यांची गरोदर असल्याचे समोर आल्यानंतर हा भयंकर प्रकार उघडकीस आला. मुलीची प्रकृती आणि घडलेला प्रकार लक्षात येताच आईच्या पायाखालची जमीन सरकली. त्यांनी तात्काळ तासगाव पोलीस ठाणे गाठून तक्रार दाखल केली.
पीडितेच्या आईच्या फिर्यादीवरून पोलिसांनी अज्ञात आरोपीविरोधात गुन्हा दाखल केला आहे. पोलीस उपनिरीक्षक प्रियांका माने या प्रकरणाचा सखोल तपास करत असून, आरोपीचा शोध घेण्यासाठी पोलिसांची पथके कार्यरत आहेत. मतिमंद आणि अल्पवयीन मुलीवर झालेल्या या अमानुष अत्याचारामुळे परिसरात सुरक्षिततेचा प्रश्न पुन्हा एकदा ऐरणीवर आला असून, आरोपीला लवकरात लवकर अटक करून कठोर शिक्षा द्यावी, अशी मागणी नागरिकांमधून केली जात आहे.
