सांगली : विधानसभा निवडणुकीचा निकाल जाहीर झाला. त्यानंतर राज्यातील सर्व विजय उमेदवारांचे अभिनंदन केले जात आहे. राज्य पातळीवरील नेत्यांचे बॅनर राज्यभरात लागले आहे. अशातच महाराष्ट्रातील सर्वात तरुण आमदार रोहित पाटील यांना शुभेच्छा देणारा फलक न्यूयॉर्क टाइम्सच्या स्क्वेअरच्या इमारतीवर झळकला आहे. त्यामुळे आपला आमदार थेट न्यूयॉर्कच्या टाइम्स स्क्वेअर इमारतीवर झळकल्याने त्यांचं सर्वत्र कौतुक होत आहे.
हा शुभेच्छा देणारा फलक सध्या सोशल मीडियावर चांगलाच व्हायरल होत आहे. रोहित पाटलांच्या अभिनंदनाचे पोस्टर थेट अमेरिकेत त्यांच्या मित्रांनी झळकल्याचं बोललं जातं आहे. याबाबत रोहित पाटलांचे काका राजाराम पाटील यांनी देखील दुजोरा दिला आहे. विशेष म्हणजे एक महिन्यांपूर्वी या ठिकाणी विजयी जाहिरातीसाठी रोहित पाटलांच्या मित्र परिवाराकडून हे बुकिंग करण्यात आल्याचं सांगण्यात येत आहे.
तासगाव कवठेमहांकाळ विधानसभा मतदारसंघात माजी खासदार संजयकाका पाटील विरुद्ध आर. आर. पाटील यांचे पुत्र रोहित पाटील यांच्या लढतीकडे राज्याचे लक्ष लागले होते. राष्ट्रवादी विरुद्ध राष्ट्रवादी असाच सामना येथे रंगला होता. संजयकाका पाटील यांचा पराभव केला. रोहित पाटील यांनी 27 हजारांच्या लीडने दणदणीत विजय मिळवला आहे. अखेर रोहित पाटील यांनी बाजी मारली. पहिल्याच निवडणुकीत ते आमदार झाले. त्याबद्दल आमदार रोहित पाटील यांना शुभेच्छा देणारा फलक थेट साता समुद्रापार अमेरिकेत झळकला आहे.
