सांगली : लोकसभा निवडणुकीचे बिगूल वाजले असून, दोन टप्प्यातील मतदानही पार पडले. मात्र, तिसऱ्या टप्प्यातील मतदानही येत्या काही दिवसांत होणार आहे. त्यातच सांगली लोकसभा जिंकण्यासाठी भाजप उमेदवार संजय पाटील यांच्या प्रचारासाठी उत्तर प्रदेशचे मुख्यमंत्री योगी आदित्यनाथ हे देखील महाराष्ट्रामध्ये येणार आहेत.
लोकसभा निवडणुकीच्या पार्श्वभूमीवर महायुतीसह महाविकास आघाडी जोरदार प्रचार करत आहे. भाजपच्या स्टारप्रचारकांचा महाराष्ट्र दौरा वाढला आहे. पंतप्रधान नरेंद्र मोदी हे दोन दिवसांपासून महाराष्ट्र दौऱ्यावर आहेत. पंतप्रधान मोदी यांनी महायुतीच्या अनेक नेत्यांसाठी प्रचारसभा घेतल्या. मोदींनी प्रचारांचा धडाका लावला आहे. त्यानंतर आता योगी आदित्यनाथ यांची महाविजय संकल्प सभा बुधवारी (दि.1) दुपारी 3 वाजता सांगली येथील चिंतामणराव वाणिज्य महाविद्यालयाच्या प्रांगणात आयोजित करण्यात आली आहे.
दरम्यान, सुरक्षा यंत्रणांनी मंगळवारी सभास्थळाची पाहणी केली. पोलिस प्रशासनाने सभेसाठी कडेकोट सुरक्षेची व्यवस्था केलेली आहे. योगी आदित्यनाथ हे पहिल्यांदाच सांगलीमध्ये येणार असल्याने भाजपकडूनही जोरदार तयारी केली जात आहे.
