सांगली : सांगलीमधून एका भीषण अपघाताची बातमी समोर आली आहे. शहरातील कुमठेफाट्याजवळ भीषण अपघाताची घटना घडली असून आईसह दोन मुलांचा जागीच दुर्दैवी मृत्यू झाला आहे. या अपघातात एकजण गंभीर जखमी असून अपघातानंतर स्थानिकांनी घटनास्थळी धाव घेतली. मात्र या अपघातात आईसह 2 मुलांचं मृत्यू झाल्याने सर्वत्र हळहळ व्यक्त केली जात आहे. ओव्हरटेक करीत असताना वडापने दुचाकीला उडविल्याने हा अपघात झाल्याची प्राथमिक माहिती मिळत आहे. दरम्यान, अपघातामध्ये दुचाकीचालक गंभीर जखमी झाला असून त्यांना शासकीय रुग्णालयात उपचारासाठी दाखल करण्यात आलं आहे.
याबाबत अधिक माहिती अशी की, तासगाव-सांगली रोडवरील कुमठेफाटा येथे ओव्हरटेक करीत असताना वडापने समोरून येणार्‍या दुचाकीला उडविल्याने आईसह दोन मुलांचा जागीच मृत्यू झाल्याची घटना घडली. तर, सबंधित महिलेचा पती मात्र गंभीर जखमी झाला असून त्यांच्यावर सांगलीतील शासकीय रुग्णालयात उपचार सुरू आहेत. दुचाकीवरील दाम्पत्य आपल्या मुलांसह सांगलीहून आटपाडीकडे निघाले होते. ते कुमठेफाटा येथे आले असता वळणावर भरधाव वेगाने तासगावकडून येणार्‍या वडापने ओव्हरटेक करीत असताना समोरून येणार्‍या दुचाकीला जोरदार धडक दिली
हा अपघाताची तीव्रता इतकी भीषण होती की, यामध्ये दुचाकीचे दोन तुकडे झाले आहेत. त्यामुळे या भीषण अपघातात आईसह दोन मुलांचा जागीच मृत्यू झाला असून महिलेच्या पतीवर रुग्णालयात अतिदक्षता विभागात उपचार सुरू आहेत. या अपघातानंतर स्थानिकांनी घटनास्थळी धाव घेत मदत करण्याचा प्रयत्न केला. मात्र, तोपर्यंत दुर्दैवाने तीन जणांचा मृत्यू झाला होता. पोलिसांनी घटनास्थळी धाव घेत घटनेचा पंचनामा केला आहे.
