संगमनेर : साखरपुडा, हळद आणि विवाह सोहळ्यासाठी गावातून नवरदेव जात असताना मिरवणूक सुरू होती. त्यावेळी तेथे डीजे वाजत होता. त्यावेळी डीजे वाहन चालकाचे वाहनावरील नियंत्रण सुटल्याने त्या वाहनाखाली मिरवणुकीला उपस्थित असलेले काही चिरडले गेले, काहींना वाहनाचा धक्का लागला. या घटनेमध्ये दोघांचा मृत्यू, तर सहा जणांना दुखापत झाली. जखमींवर संगमनेर शहरातील खासगी रुग्णालयात उपचार सुरू आहेत. ही घटना गुरुवारी चार जानेवारी रोजी दुपारी ४.३० सुमारास तालुक्यातील धांदरफळ खुर्द गावात घडली.
बाळासाहेब हरिभाऊ खताळ (वय ४८), भास्कर राधू खताळ (वय ७३) अशी मृत्यू झालेल्यांची नावे आहेत. अभिजीत संतोष ठोंबरे (वय २२), रामनाथ दशरथ काळे (वय ६५), गोरक्ष पाटीलबा खताळ, सोपान राबवा खताळ, भारत भागा खताळ, सागर शंकर खताळ अशी (सर्व रा. धांदरफळ खुर्द, ता. संगमनेर) अशी जखमींची नावे आहेत. घटनेची माहिती मिळताच संगमनेर उपविभागाचे उपविभागीय पोलिस अधिकारी सोमनाथ वाघचौरे, तालुका पोलिस ठाण्याचे वरिष्ठ पोलिस निरीक्षक देविदास ढुमणे-पाटील, पोलिस हेड कॉस्टेबल अमित महाजन हे तातडीने घटनास्थळी असून पोलिसांची पुढील कार्यवाही सुरू आहे.
