कोल्हापूर : कोल्हापूर जिल्ह्यातील जयसिंगपूरनढे पूर्वी झालेल्या भांडणाचा राग मनात धरुन तरुणावर तलवारीने हल्ला केल्याची धक्कादायक घटना घडली आहे. शहरातील नांदणी नाका रस्त्यावर तरुणावर तलवारीने हल्ला करण्यात आला आहे. दरम्यान, आई स्वत:च ढाल बनून तलवारीच्या वारपासून मुलाला वाचवले आहे.
त्यानंतर दगड घेऊन हल्लेखोरांच्या अंगावरही आई धावून गेल्याचं व्हिडीओ मध्ये दिसत आहे. जयसिंगपूरमधील या घटनेचा व्हिडिओ सध्या सोशल मीडियावर तुफान व्हायरल होत आहे. ही घटना रविवारी (दि. १८) दुपारी दीड वाजण्याच्या सुमारास उघडकीस आली आहे.
या घटनेत सुनिल रामाप्पा लमाणी (वय 28, रा. नांदणी नाका, लमाणी वसाहत धरणगुत्ती, ता. शिरोळ) हा युवक जखमी झाला असून विनोद कासू पवार,अरविंद कासू पवार आणि विनोद बाबू जाधव या तिघांविरुध्द जयसिंगपूर पोलिस ठाण्यात गुन्हा दाखल करण्यात आला आहे. भरदिवसा गजबजलेल्या भागात तलवारीने हल्ला झाल्याची घटना घडल्याने परिसरात दहशतीचं वातावरण निर्माण झालं आहे.
नेमक काय घडलं?
सुनील लमाणी याचे वडील लघुशंकेकरिता गेले होते. सुनील व त्याची आई वाट पाहत रस्त्यावर थांबले होते. यावेळी तिघे संशयित मोटारसायकलवरून आले. त्यातील विनोद पवार याने शिवीगाळ करण्यास सुरुवात केली. तसेच त्याने सुनीलवर तलवारीने वार केला. पाठीवर वार झाल्याने सुनील जखमी झाला. त्यानंतर प्रतिकार करत सुनील व त्याच्या आईने संशयितांवर दगडफेक केल्यानंतर ते पळून गेले. .
लेकासाठी जीवावर उदार होऊन लढणारी माऊली
या घटनेत आईच मुलाच्या अंगावर येणारी तलवार वाचवणारी ढाल बनली. त्यामुळे लेकासाठी जीवावर उदार होऊन लढणारी माऊली पुन्हा एकदा समाजाने पाहिली आहे. या घटनेमध्ये पूर्वी झालेल्या भांडणाचा राग मनात धरुन तरुणावर तलवार हल्ला करण्यात आल्याचं प्राथमिक तपासात समोर आलं आहे.
View this post on Instagram
