सोलापूर : मराठा आरक्षणाच्या मागणीसाठी दौरा करत असलेल्या मनोज जरांगे पाटील यांच्या ताफ्याला भीषण अपघात झाल्याची घटना समोर आली आहे. ताफ्यातील वाहनांना अचानक ब्रेक लागल्याने काही गाड्या एकमेकांवर आदळल्या. त्याचवेळी मागून येणाऱ्या एसटी बसने ताफ्यातील एका वाहनाला जोरदार धडक दिली. या दुर्घटनेत एक मराठा कार्यकर्ता गंभीर जखमी झाला आहे.
मिळालेल्या माहितीनुसार, मनोज जरांगे पाटील यांचा ताफा महामार्गावरून जात असताना अचानक पुढील वाहनांना ब्रेक लावण्यात आले. त्यामुळे मागील गाड्यांच्या चालकांना वाहनांवर नियंत्रण ठेवणे कठीण झाले. काही वाहने एकामागोमाग एक धडकली.
याचवेळी मागून वेगाने येणाऱ्या एसटी बसने ताफ्यातील एर्टिगा कारला धडक दिली. बसची धडक इतकी जोरदार होती की, एर्टिगा कारच्या पुढील आणि मागील भागाचे मोठे नुकसान झाले. वाहनाचा अक्षरशः चुराडा झाल्याचे घटनास्थळी दिसून आले.
अपघातानंतर ताफ्यातील कार्यकर्ते आणि स्थानिक नागरिकांनी तातडीने मदतकार्य सुरू केले. कारमध्ये अडकलेल्या कार्यकर्त्याला बाहेर काढून उपचारासाठी जवळच्या रुग्णालयात दाखल करण्यात आले. त्याची प्रकृती गंभीर असल्याची माहिती समोर आली आहे.
दरम्यान, या अपघातात मनोज जरांगे पाटील सुरक्षित असल्याचे सांगण्यात आले आहे. त्यांच्या वाहनाला कोणतीही मोठी हानी झालेली नाही. अपघाताची माहिती मिळताच पोलिसांनी घटनास्थळी धाव घेतली आणि वाहतूक सुरळीत करण्यासाठी प्रयत्न केले. अपघात नेमका कोणत्या कारणामुळे झाला, एसटी बसचा वेग किती होता आणि वाहनचालकांचे नियंत्रण कशामुळे सुटले, याचा तपास पोलीस करत आहेत.
