सोलापूर : ज्वारी काढणीचे काम आटपून शेतातून दुचाकीने घरी परतत असताना वाहनाच्या धडकेत शेतक-याचा मृत्यू झाल्याची घटना सोलापूरमध्ये घडली आहे. तर, एक जण गंभीर जखमी झाला. विशेष म्हणजे अपघातानंतर वाहनचालक फरार झाला आहे. मंगळवेढा पोलीस सध्या फरार आरोपीचा शोध घेत आहेत.
शिवाजी कांबळे (वय ६०, रा. जालीहाळ) असे मृत शेतकऱ्याचे नाव आहे. वाहनाची घडक इतक्या जोरदार होती की, त्यात शिवाजी कांबळे यांचा जागीच मृत्यू झाला. रविवार, ४ फेब्रुवारी रोजी दुपारी २ वाजता हा अपघात झाला. याबाबत मुलगा नवनाथ कांबळे याने मंगळवेढा पोलिसात फिर्याद दिली आहे.
मिळालेल्या माहितीनुसार, शिवाजी कांबळे व भारत व्हरगळ हे दोघे मंगळवेढा शिवारात ज्वारी काढणीचे काम संपवून दुपारी जालीहाळ येथे घराकडे दुचाकीवरून परतत होते. हिवरगाव-जालीहाळ रस्त्यावर विद्यानिकेतन विदयालयाजवळ हाजापूरकडून भाळवणीकडे निघालेल्या वाहनाने त्यांना जोराची धडक दिली. या अपघातात भारत व्हरगळ हे गंभीर जखमी झाले तर शिवाजी कांबळे याचा जागीच मृत्यू झाला.
