अहमदनगर : अहमदनगरमधून एक संतापजनक बातमी समोर येत आहे. एका शाळेत अल्पवयीन विद्यार्थिनीचे हात-पाय आणि तोंड बांधून तिला शाळेच्या टेरेसवर सोडून दिल्याचा धक्कादायक प्रकार घडल्याच समोर आलं आहे. अहमदनगरपासून जवळच असलेल्या पिंपळगाव उज्जैनी येथील शाळेत ही घटना घडली आहे. या प्रकरणी एमआयडीसी पोलिस ठाण्यामध्ये गुन्ह्याची नोंद करण्यात आली आहे.
सोमवारी सायंकाळी ४. ३० वाजायच्या दरम्यान एका अज्ञात व्यक्तीने संबंधित अल्पवयीन विद्यार्थिनीचे तोंड दाबून तिला शाळेच्या टेरेसवर नेऊन तिचे हात, पाय आणि तोंड बांधून ठेवले. साडेपाच वाजता टेरेसवरून आवाज येत असल्याने गावातील काही ग्रामस्थ शाळेच्या टेरेसवर गेले असता त्यावेळी त्यांना ही मुलगी हात-पाय बांधलेल्या अवस्थेत दिसून आली. या घटनेने परिसरात एकच खळबळ उडाली आहे.
दरम्यान, या मुलीला सोडवतानाचा व्हिडीओ समाज माध्यमावर सध्या व्हायरल होत आहे. हमदनगरच्या एमआयडीसी पोलिस ठाण्यात त्या अज्ञात व्यक्तीविरोधात गुन्हा दाखल झाला असून पोलिस पुढील तपास करत आहेत.
