सांगली : येथील तासगाव – मणेराजुरी मार्गावर एक भीषण अपघात झाला आहे. एक कार कॅनॉल मध्ये पडून एकाच कुटुंबातील 6 जणांचा मृत्यू झाला आहे तर एक महिला गंभीर जखमी झाली आहे. यावेळी पोलिसांकडून मिळालेल्या माहितीनुसार, चिंचणी जवळ मध्यरात्री ऑल्टो कार कॅनॉलमध्ये कोसळून हा भीषण अपघात झाला. मात्र आज सकाळी हे प्रकरण उघडकीस आलं आहे.
मिळालेल्या माहितीनुसार, सदर अपघात तासगाव – मणेराजुरी मार्गावर चिंचणीजवळ झाला. या दुर्घटनेतील सर्वजण एकाच कुटुंबातील असल्याचे सांगितले जातं आहे. हे कुटुंब तासगावमधीलच होते. अपघाताच्यावेळी ऑल्टो कारमध्ये एकूण सात जण होते. मुलीच्या वाढदिवसानिमित्त पाटील-भोसले कुटुंबीय तासगाववरून वाढदिवसासाठी कवठेमहांकाळ येथील कोकळे गावात गेले होते.
तेथून परतत असताना हा अपघात झाला. चालकाच्या डोळ्यांवर झोप असल्याने त्याला डुलकी लागली असावी आणि कार थेट कॅनॉलमध्ये जाऊन कोसळली असावी, असा प्राथमिक अंदाज आहे. या दुर्घटनेतील मृतांमध्ये तीन लहान बालकांचा समावेश आहे.
अपघाताची माहिती मिळताच स्थानिकांसह पोलिसांनीदेखील तातडीने घटनास्थळी धाव घेत बचावकार्य सुरू केले. यावेळी सहा मृतांमध्ये तीन मुले, एक पुरुष, दोन महिलांचा समावेश आहे. राजेंद्र पाटील, राजराम पाटील, सुजाता राजेंद्र पाटील, राजीव विकास पाटील, प्रियांका खराडे (वय 2 वर्ष) आणि ध्रुवा पाटील अशी या अपघातात मृत पावलेल्यांची नावे आहेत. या दुर्घटनेत एक महिला गंभीर जखमी झाली असून तिला उपचारांसाठी रुग्णालयात दाखल करण्यात आले आहे. तर मृतदेह शवविच्छेदनासाठी पाठवण्यात आले आहेत.
