नाशिक : नाशिक शहरातील (Nashik Crime) म्हसरूळ परिसरात एका व्यावसायिक फोटोग्राफर तरुणी आणि तिच्या मैत्रिणीला एका हॉटेलमध्ये जबरदस्तीने डांबून (Nashik News) पिस्तुलाचा धाक दाखवत अनैतिक व्यवसाय करण्याबाबत सांगितल्याची धक्कादायक घटना समोर आली आहे. या प्रकरणी म्हसरूळ पोलीस ठाण्यात हॉटेलचालकासह त्याच्या साथीदाराविरुद्ध गंभीर गुन्हे दाखल करण्यात आले आहेत.
सुमारे चार महिन्यांपूर्वी घडलेल्या घटनेत सुरुवातीला पीडित तरुणीने भीतीपोटी तक्रार दाखल केली नव्हती. मात्र, आरोपीकडून पुन्हा धमक्या मिळाल्यानंतर तिने अखेर पोलिसांकडे धाव घेतली. तत्काळ कारवाई करत संशयित हॉटेल चालक सौरभ संजय देशमुख आणि त्याचा साथीदार वेटर मोहीत मिलिंद ताम्हाणे यांना अटक करण्यात आली. नाशिक जिल्हा न्यायालयाने दोघांना तीन दिवसांची पोलिस कोठडी सुनावली आहे.
सौरभ देशमुख याचे ‘कॅटल हाउस’ हॉटेल असून, यापूर्वीही त्याच्यावर बेकायदेशीर कृत्यांबाबत कारवाई झाली आहे. विशेष म्हणजे देशमुख हा एका निवृत्त पोलिस अधिकाऱ्याचा मुलगा आहे. पोलिसांच्या माहितीप्रमाणे, हॉटेलमध्ये अनेकदा अनैतिक व गैरकायदेशीर व्यवहार होत असल्याच्या तक्रारी होत असल्याने तो आणि त्याचे कर्मचारी वैयक्तिक वॉकी-टॉकी वापरत होते.
तपासात समोर आले की, पीडित तरुणी आणि तिच्या मैत्रिणीचा वेटर मोहीत ताम्हाणेशी पूर्वीपासूनच परिचय होता आणि 2020 पासून आर्थिक मदत घेतली जात होती. एके दिवशी त्यांना माहिती मिळाली की मोहीत ‘कॅटल हाउस’ हॉटेलमध्ये आहे. त्यावेळी त्या दोघी आणि त्यांचा मित्र हॉटेलमध्ये गेले. सौरभ देशमुख यांनी त्यांना धमकावून म्हटले, “तुम्ही येथे येऊन मोठी चूक केली आहे. माझ्या हॉटेलमध्ये कॉलगर्ल्स पुरवल्या जातात, तुम्ही दोघीही तेच काम करा. चांगले पैसे देतील, मोहीतकडून पैसे मागण्याची गरज नाही,” असे सांगितले.
तिघांनी पळण्याचा प्रयत्न केला, पण देशमुख यांनी पिस्तुलाचा धाक दाखवत त्यांना बंद खोलीत डांबून ठेवले आणि जिवे मारण्याची धमकी दिली. त्यांच्या जवळील 21 हजार रुपये देखील त्यांनी काढून घेतले. अखेर पहाटे साडेपाचच्या सुमारास त्यांना सोडण्यात आले.
काही दिवसांनी मोहीत ताम्हाणे यांनी व्हॉट्सॲपवरून पुन्हा धमकीचे मेसेज पाठवले. त्यानंतर पीडित तरुणींनी पोलिसांत धैर्य दाखवून तक्रार दाखल केली. या प्रकरणी विनयभंग, जबरदस्ती, डांबून ठेवणे, दरोडा, धमकी देणे अशा गंभीर कलमांन्वये गुन्हा नोंदवण्यात आला आहे. प्राथमिक तपासात संशयितांवर पूर्वीही असेच आरोप असल्याचे स्पष्ट झाले आहे.
