पिंपरी : मोरवाडी परिसरात किरकोळ कारणावरून झालेल्या वादाचे रूपांतर हिंसक हल्ल्यात झाल्याची घटना समोर आली आहे. लिफ्टमधील शू रॅकवर थुंकल्याच्या मुद्द्यावरून झालेल्या वादातून एका महिला आणि अल्पवयीन मुलाने मिळून पती-पत्नीवर चाकूने हल्ला केल्याचा आरोप आहे.
ही घटना बुधवारी रात्री घडली. पोलिसांनी दिलेल्या माहितीनुसार, संबंधित जोडपे इमारतीतील लिफ्टने खाली जात असताना शू रॅकवर थुंकल्याचे त्यांच्या निदर्शनास आले. त्याबाबत ते आपापसात चर्चा करत असताना तेथे उपस्थित असलेल्या एका अल्पवयीन मुलासोबत त्यांचा वाद झाला.
वाद वाढल्यानंतर अल्पवयीन मुलाने शिवीगाळ करत धमकी दिल्याचा आरोप करण्यात आला आहे. त्यानंतर परिस्थिती अधिक चिघळली आणि मुलासोबत असलेल्या महिलेने वादात हस्तक्षेप केला. यानंतर दोघांनी मिळून धारदार शस्त्राने पती-पत्नीवर हल्ला केल्याचे तक्रारीत नमूद करण्यात आले आहे.
या हल्ल्यात दोघेही जखमी झाले असून त्यांच्यावर रुग्णालयात उपचार सुरू आहेत. जखमी महिलेने संत तुकारामनगर पोलीस ठाण्यात तक्रार दाखल केली आहे.
तक्रारीनुसार पोलिसांनी गुन्हा नोंदवून संबंधित महिलेला अटक केली आहे. तसेच या प्रकरणातील अल्पवयीन मुलाविरुद्धही कायदेशीर कारवाई सुरू करण्यात आली आहे.
किरकोळ कारणावरून झालेल्या वादाने हिंसक स्वरूप धारण केल्याने परिसरात खळबळ उडाली आहे. पोलिसांकडून घटनेचा पुढील तपास सुरू आहे.
