Pandharpur Nagarpalika Election: जिल्ह्यातील पंढरपूर नगरपालिका निवडणुकीच्या (Pandharpur Nagarpalika Election) नगराध्यक्ष पदासाठी महाविकास आघाडीकडून दिवंगत आमदार भारत नाना भालके यांची मुलगी डॉ. प्रणिती भगीरथ भालके (Praniti Bhalke ) यांची उमेदवारी जाहीर करण्यात आली आहे. अशी माहिती काँग्रेसच्या सोलापूर लोकसभा मतदारसंघाच्या खासदार प्रणिती शिंदे (MP Praniti Shinde) यांनी दिली. डॉ. प्रणिती भालके यांनी आपला उमेदवारीचा अर्ज आज (१६ नोव्हेंबर) दाखल केला आहे.
जिल्ह्यातील एकूण 11 नगरपालिका व एक नगरपंचायतिच्या निवडणुकीमध्ये काँग्रेस काही ठिकाणी आघाडीकरून तर काही ठिकाणी स्वबळावर लढणार आहे. मात्र, उद्या अर्ज भरण्याचा शेवटचा दिवस आहे. त्यामुळे उद्या हे चित्र अधिक स्पष्ट होईल असे प्रणिती शिंदे म्हणाल्या. यावेळी पंढरपूरमध्ये नवीन आघाडी निर्माण झाली आहे. भाजपला रोखण्यासाठी सर्वच पक्षांनी एकजूट दाखवत पंढरपूर तीर्थक्षेत्र विकास आघाडीची स्थापन केली आहे. या आघाडीच्या माध्यमातून भाजपला पंढरपूर नगरपालिकेच्या सत्तेवरून पायउतार करण्यासाठी डॉ. प्रणिती भालके यांना उमेदवारी जाहीर करण्यात आली आहे.
यावेळी येथे भाजपच्या विरोधात सर्व पक्षांनी एकत्र येत आघाडी केली आहे. यावेळी भाजपसमोर मोठं आव्हान असणार आहे. मात्र अजून महायुतीकडून कोण अर्ज दाखल करणार हे स्पष्ट झालेलं नाही. कोणता उमेदवार रिंगणात उतरतो याकडे सर्वांचे लक्ष लागले आहे.
