Maratha Reservation : कोल्हापूर : राज्य सरकारचा महसूल विभाग कुणबी नोंदी शोधण्यासाठी कामाला लागला आहे. प्रशासकीय स्तरावर कुणबी नोंदी शोधण्याचे काम युद्धपातळीवर सुरू आहे. जिल्हा प्रशासन, जिल्हा परिषदेसह महापालिक स्तरावर देखील हे काम सुरू आहे. जिल्हाधिकारी कार्यालयात, तर स्वतंत्र कक्ष स्थापन करण्यात आला आहे. आरक्षणाचा पाया रचला त्या छत्रपती राजर्षी शाहू महाराजांच्या कोल्हापूरमध्ये जिल्हा प्रशासनाकडे आत्तापर्यंत विविध विभागांतील ५ हजार ५६६ नोंदी मिळाल्याची माहिती जिल्हा प्रशासनाने जिल्हा माहिती कार्यालयाकडून दिली आहे.
कोल्हापूर जिल्हा प्रशासनाकडून कुणबी नोंदी शोधण्यासाठी जोरदार मोहिम सुरु आहे. या मोहिमेअंतर्गत जिल्ह्यात ५ हजार ५६६ नोंदी सापडल्या आहेत. सर्वाधिक ११८५ नोंदी कागल तहसील कार्यालयाकडून झाल्या आहेत. राज्य सरकारने नेमलेल्या समितीच्या पहिल्या अहवालाच्या अनुषंगाने जिल्हाधिकारी राहुल रेखावार आणि निवासी उपजिल्हाधिकारी संतोष तेली यांच्या मार्गदर्शनाखाली अभिलेख शोधण्याचे काम वेगाने सुरू आहे. यासाठी स्वतंत्र कक्ष स्थापन केला आहे. सर्वाधिक नोंदी या कागल व करवीर तालुक्यातील आहेत. दरम्यान, सुरुवातालीच हजारो नोंदी सापडल्याने मराठवाड्यापेक्षा जास्त नोंदी कोल्हापूर जिल्ह्यात आढळतील, असा अंदाज वर्तवण्यात येत आहे.
कोल्हापूर जिल्ह्यातील कुणबी, मराठा कुणबी व कुणबी मराठा या नोंदी तपासण्यासाठी जिल्हाधिकारी कार्यालयात “विशेष कक्ष” स्थापन करण्यात आला आहे. तसेच उपविभागीय अधिकारी यांच्या अध्यक्षतेखाली तालुकास्तरीय समित्यांची स्थापना केली आहे. निवासी उपजिल्हाधिकारी संजय तेली हे या कक्षाचे समन्वय अधिकारी आहेत. तलाठी, कोतवाल, अन्य कर्मचारी, कंत्राटी कर्मचारी, ऑपरेटर यासह जेलचे पोलीस कर्मचारी, जिल्हा उपनिबंधक कार्यालयाचे कर्मचारी, अंशकालीन कर्मचारी अशा वेगवेगळ्या गटातील सर्व कर्मचारी सध्या कुणबी नोंदीचा शोध घेत आहेत. त्यासाठी सर्व रेकॉर्ड तपासून पाहिले जात आहे.
नियुक्त अधिकारी आणि कर्मचाऱ्यांनी कुणबी नोंदीला प्राधान्य देण्याच्या सूचना प्रशासनाने दिल्या आहे. दरम्यान, जेवढ्या जास्ती-जास्त नोंदी मिळणार आहेत, तेवढ्या प्रमाणात कुणबी दाखले देण्यास मदत होणार आहे. ही मोहीम सरकारची पुढील सूचना येईपर्यंत सुरू राहणार आहे. तोपर्यंत तालुका पातळीवर विविध विभागांतर्गत कुणबी नोंदीचा शोध घेतला जात आहे. कुणबी नोंदी तपासण्यसाठी युद्धपातळीवर काम करण्याचे आदेश तसेच तपासलेल्या अभिलेख्यांचा अहवाल दररोज सादर करा, असे निर्देश जिल्हाधिकारी राहुल रेखावार यांनी संबंधित विभागांचे अधिकारी, प्रांताधिकारी व तहसीलदार यांना दिले.
कुणबी नोंदी तपासण्यासाठी मिशन मोडवर मोहीम राबवा. त्यासाठी सर्व विभागांनी अधिकारी व कर्मचाऱ्यांची नियुक्ती करुन कार्यवाही गतिमान करा. त्याचबरोबर सर्व विभागांच्या अधिकाऱ्यांनी समन्वयाने हे काम युद्धपातळीवर पूर्ण करावे. कुणबी नोंदीच्या अभिलेखांचे तसेच मोडी, उर्दू लिपीतील अभिलेखांचेही भाषांतर करुन डिजिटायजेशन करुन संवर्धन करा. यासाठी पुराभिलेखागार कार्यालय व शिवाजी विद्यापीठाचा भाषा विभागाच्या माध्यमातून अधिकृत मोडी लिपी भाषिक, वाचक यांची मदत घ्या, अशी सूचना जिल्हाधिकारी रेखावार यांनी दिली आहे
