सोलापुर : सोलापुरमधून भीषण अपघाताची बातमी समोर आली आहे. सोलापुरमध्ये गणेश भक्तांच्या छोट्या टेम्पोला सिमेंट मिक्सरनं धडक दिली. या अपघातामध्ये दहा ते बारा जण जखमी झाल्याची माहिती मिळत आहे. शनिवारी रात्री आठच्या सुमारास हा अपघात झाला असून कुंभारी विडी घरकुल भागातून लष्कर परिसराकडे हे सर्व भक्त गणरायाची मूर्ती घेऊन निघालेले असताना हा अपघात झाला आहे. जखमींना स्थानिकांच्या मदतीनं रुग्णालयात दाखल करण्यात आलं आहे.
मिळालेल्या माहितीनुसार, सोलापुरात गणरायाची मूर्ती घेऊन निघालेल्या एक छोटा हत्ती आणि दुचाकी वाहनाला सिमेंट मिक्सरनं धडक दिली आहे. या अपघातात 10 ते 12 जण जखमी झाल्याची माहिती आहे. कुंभारी विडी घरकुल भागातून लष्कर परिसराकडे हे सर्व भक्त गणरायाची मूर्ती घेऊन निघाले असल्याची माहिती मिळत आहे. मात्र रात्री 8 च्या सुमारास एका सिमेंट मिक्सरनं या भक्तांच्या गाडीला जोरदार धडक दिली.
यामुळे गाडीत असलेले नंदिनी म्हेत्रे (वय 15), गणेश मच्छा(वय 16), प्रशांत नवगिरे(वय 15), सुवर्णा चिन्नापागलू (वय 18), गोविंद काडे (वय 36) हे सर्व गणेश भक्त जखमी झाले आहेत. तर अन्य काही जणांना किरकोळ मार लागल्याची माहिती समोर आली आहे. या सर्व जखमींना सोलापूरच्या शासकीय रुग्णालयात उपचारासाठी दाखल करण्यात आले आहे.
