सोलापूर: सोलापूर (Crime News) शहरात सध्या गुन्हेगारीचा आलेख चिंताजनक पद्धतीने वाढत असतानाच, समाधान नगर परिसरात मध्यरात्री माणुसकीला काळिमा फासणारी एक घटना घडली आहे. केवळ मोबाईल देण्या-घेण्यावरून वाद झाला आणि एका 39 वर्षीय तरुणाची हत्या करण्यात आली. वंडरलँड सिटी शेजारील एका बिअर शॉपीसमोर ही घटना घडली असून, यामुळे संपूर्ण परिसरात दहशतीचे वातावरण पसरले आहे.

मृत शेकुंबर महिबूब नदाफ आणि आरोपी हे एकमेकांच्या ओळखीचे होते. सोमवारी मध्यरात्री 1 वाजेच्या सुमारास त्यांच्यात गप्पा सुरू होत्या. प्रत्यक्षदर्शींनी दिलेल्या माहितीनुसार, सुरुवातीला हा वाद केवळ चेष्टा-मस्करीतून सुरू झाला. मात्र, एकाने दुसऱ्याचा मोबाईल हिसकावल्याने ठिणगी पडली. रागाच्या भरात असलेल्या आरोपींपैकी मल्लीनाथ माशाळे याने शेकुंबरला मारहाण सुरू केली, तर श्रीकृष्ण देशमुख याने रागाच्या भरात जवळच असलेला एक मोठा दगड शेकुंबरच्या डोक्यात घातला. हा वार इतका भीषण होता की शेकुंबर यांचा जागीच मृत्यू झाला.
शेकुंबर यांच्या पत्नी सायरा शेख यांनी दिलेल्या फिर्यादीनंतर पोलिसांनी तत्काळ कारवाई करत श्रीकृष्ण देशमुख आणि मल्लीनाथ माशाळे या दोन्ही संशयितांना ताब्यात घेतले आहे. अधिक तपास पोलिस करत आहेत.








