सातारा : सातारा शहरात सोशल मीडियाच्या (Crime News) माध्यमातून ओळख झाल्यानंतर एका विवाहित महिलेवर लग्नाचे आमिष दाखवत वारंवार अत्याचार केल्याचा धक्कादायक प्रकार समोर आला आहे. इतकेच नव्हे तर आरोपीने गुपचूप काढलेल्या अश्लील व्हिडिओच्या आधारे (Satara News) महिलेला ब्लॅकमेल करत धमक्या दिल्याचा आरोपही करण्यात आला आहे. या प्रकरणी सातारा शहर पोलीस ठाण्यात गुन्हा दाखल करण्यात आला असून प्रतीक दिलीप वाघमारे (रा. गोडोली, सातारा) याच्यावर आरोप ठेवण्यात आले आहेत. (Satara Crime)
पोलिसांकडून मिळालेल्या माहितीनुसार, पीडित महिला आणि संशयित आरोपी यांची जानेवारी 2023 मध्ये इन्स्टाग्रामवर ओळख झाली होती. सुरुवातीला साध्या संवादातून सुरू झालेली ओळख हळूहळू मैत्रीत बदलली. त्या काळात पीडित महिलेचा घटस्फोटाचा खटला न्यायालयात सुरू असल्याची माहिती आरोपीला मिळाली. त्यानंतर आरोपीने तिचा विश्वास संपादन करत लग्नाचे आश्वासन दिले आणि तिच्याशी जवळीक वाढवली.
तक्रारीनुसार, जुलै 2024 मध्ये आरोपीने महिलेच्या राहत्या घरी प्रथम तिच्यावर अत्याचार केल्याचा आरोप आहे. त्यानंतर कास रोडवरील एका हॉटेलमध्ये नेऊन पुन्हा अत्याचार करण्यात आले. या वेळी आरोपीने गुपचूप व्हिडिओ क्लिप तयार केली. नंतर हा व्हिडिओ दाखवत तो महिलेला धमकावू लागला. व्हिडिओ हटवण्याची विनंती केल्यानंतरही आरोपीने उलट त्याचाच आधार घेत महिलेला ब्लॅकमेल करण्यास सुरुवात केली.
पुढील काही महिन्यांत आरोपीने या व्हिडिओचा धाक दाखवत तिला वेगवेगळ्या ठिकाणी नेले. पाचगणी येथील एका व्हिलामध्ये तसेच डिसेंबर 2025 मध्ये सातारा शहरातील एका कॅफेमध्ये नेऊन तिच्यावर पुन्हा अत्याचार केल्याचा आरोप तक्रारीत करण्यात आला आहे. या काळात आरोपीकडून सतत धमक्या दिल्या जात असल्याने महिला मानसिक दबावाखाली होती.
मात्र आरोपीच्या त्रासाला कंटाळून अखेर पीडित महिलेने पोलिसांकडे धाव घेतली. तिने तक्रार करण्याचा निर्णय घेतल्याचे कळताच आरोपीने अश्लील व्हिडिओ व्हायरल करण्याची धमकी दिली होती. तरीही महिलेने धैर्य दाखवत सातारा शहर पोलीस ठाण्यात फिर्याद दिली. पोलिसांनी आरोपीविरुद्ध गुन्हा दाखल केला असून पुढील तपास सुरू आहे.
