लहू चव्हाण
पाचगणी : ‘आय लव पाचगणी’ फेस्टिवलमध्ये प्रसिद्ध नृत्यदिग्दर्शिका फुलवा खामकरच्या टीमचा डान्स शो ३ डिसेंबर रोजी सायंकाळी साडेसहा वाजता कै. भाऊसाहेब भिलारे स्टेडियमवर होणार आहे. पाचगणी व परिसरातील चाहत्यांसाठी हा सुखद धक्काच आहे.
‘फुलवा’ म्हणजे अप्सरांना आपल्या तालावर नाचवणारी नृत्यांगना, नृत्य शिक्षिका, नृत्य दिग्दर्शिका. फुलवाने नटरंग, मितवा अशा प्रसिद्ध चित्रपटांतील बड्या कलाकारांना आपल्या नृत्यदिग्दर्शन केले आहे. ‘वाजले की बारा’ असो किंवा ‘अप्सरा आली’ मराठीतील अनेक चित्रपटांमध्ये नृत्यदिग्दर्शन करणारी सर्वांची लाडकी नृत्य दिग्दर्शिका म्हणून फुलवा खामकरला ओळखले जाते. सुप्रसिद्ध नृत्यदिग्दर्शिका फुलवा खामकर यांची टीम कै. भाऊसाहेब भिलारे स्टेडियमवर शो गाजवणार आहे.
या कार्यक्रमाची कमालीची उत्सुकता लागली असून नृत्याचे अनोखे प्रकार या मंचावर पाहायला मिळणार असल्याची माहिती फेस्टिवलचे माजी अध्यक्ष आर्किटेक्ट, डिझाईनर राजेंद्र भगत यांनी दिली.
