सांगली : सांगलीतून एक अपघाताची घटना समोर येत आहे. पोलीस भरतीच्या सरावासाठी दोन दुचाकी वाहनांवरून निघालेल्या ४ तरुणांना भरधाव वाहनाने धडक दिल्याने भीषण अपघात झाला आहे. या अपघताता एक तरुण जागीच ठार झाला असून तीन जण गंभीर जखमी झाले आहेत. शिरीष अमसिद्ध खंबाळे वय 21 राहणार भोसे असं जागीच ठार झालेल्या तरुणाचे नाव आहे.
तर विश्वजीत विजय मोहिते (वय 24), प्रथमेश उत्तम हराळे (वय 24), दोघे राहणार भोसे, प्रज्वल साळुंखे (वय 24) राहणार कसबे डिग्रज अशी गंभीर जखमी झालेल्या तरुणांची नावे आहेत. हा अपघात सांगलीच्या मिरज तालुक्यातील भोसे इथं घडला आहे. या घटनेने तरुणांच्या कुटुंबांना मोठा धक्का बसला आहे.
याबाबत मिळालेली अधिक माहिती अशी की, सांगली जिल्ह्यातील मिरज तालुक्यातील भोसे येथील तरुण सांगली जिल्हा क्रीडा संकुल कडे जात होते. पोलीस भरतीच्या सरावासाठी दोन दुचाकी वाहनावरून जात असताना चार तरुणांना भरधाव वेगाने मागून येणाऱ्या पिकप वाहनाने जोरदार धडक दिली. हा अपघात इतका भीषण होता की, यामध्ये एक तरुण जागीच ठार झाला आहे. तर अन्य तीन जण गंभीर जखमी झाले आहेत.
या घटनेची माहिती मिळताच भोसे गावातील नातेवाईक आणि पोलिस भरती सराव करणाऱ्या तरुणांनी घटनास्थळी धाव घेत अपघातातील दोन तरुणांना मिरज शासकीय रुग्णालयात उपचारासाठी दाखल करण्यात आले. तर प्रज्वल साळुंखे याला खाजगी रुग्णालयात उपचार सुरू आहेत. शिरीष खंबाळे हा जागीच ठार झाल्याने कुटुंबावर दुःखाचा डोंगर कोसळला आहे.
