सोलापूर: सोलापूरमधून धक्कादायक घटना समोर आली आहे. राष्ट्रवादी कॉँग्रेस अजित पवार गटाचे सरचिटणीस ओंकार महादेव हजारे या युवा नेत्याचा मृतदेह बंद कारमध्ये आढळून आला. या घटनेमुळे परिसरात एकच खळबळ उडाली आहे. दरम्यान, युवा नेत्याने आत्महत्या केल्याचे सांगण्यात येत आहे. या घटनेचा तपास सोलापूर पोलिसांकडून सुरू आहे.
रविवारी(8 जून ) हजारे दुपारच्या सुमारास कारमध्ये बसले होते. त्यानंतर ते बराच वेळ कारच्या बाहेर आले नाहीत. त्यानंतर घरच्यांनी कारच्या दरवाजातून आत पाहिले असता ओंकार हजारे सीटवर शांत पडले दिसून आले. त्यानंतर कारचा दरवाजा तोडून बेशुद्धावस्थेत त्यांना बाहेर काढले. त्यानंतर नातेवाईकांनी तत्काळ उपचारासाठी त्यांना रुग्णालयात दाखल केले. परंतु डॉक्टरांनी त्यांचा मृत्यू झाल्याचे घोषीत केले.
ओंकार हजारे यांची सोलापूरमध्ये पार्थ पवार यांचे विश्वासू आणि अत्यंत निकटवर्तीय म्हणून ओळख होती. हजारे यांनी पक्षाच्या संघटनात्मक कामावर भर देऊन पक्षासाठी त्यांनी तरुणांचे संघटन तयार केले. त्यांच्या अकाली मृत्युमुळ पक्षासह जिल्ह्यातील राजकीय क्षेत्राचे मोठं नुकसान झालं आहे.
2019 मध्ये हजारे यांचा विवाह झाला होता. त्यांच्या पश्चात आई-वडील, पत्नी, भाऊ, भावजय असा परिवार आहे. गेल्या काही महिन्यांपासून ओंकार हजारे हे कौटुंबीक कारणामुळे नैराश्यात होते असे सांगण्यात येत आहे.
