मुंबई: शाळकरी मुलांच्या सुरक्षिततेसाठी महाराष्ट्र सरकारने एक महत्त्वपूर्ण पाऊल उचलले आहे. शालेय शिक्षण विभागाने जारी केलेल्या नव्या नियमांनुसार, आता राज्यातील सर्व शाळेतील बस स्कूल बस चालक, सफाई कर्मचारी आणि महिला कर्मचाऱ्यांना दिवसातून दोन वेळा, म्हणजेच सकाळी एकदा आणि संध्याकाळी एकदा, अल्कोहोल आणि ड्रग्ज चाचणी करावी लागणार आहे. कर्तव्यावर असताना कर्मचाऱ्यांनी कोणत्याही अंमली पदार्थांचे सेवन केलेले नाही , याची खात्री करण्यासाठी या चाचण्या केल्या जाणार आहेत.
शाळांनी बस चालकांची पार्श्वभूमी तपासणी करणे, बंधनकारक केले आहे, असे निर्देशही शासनाने दिले आहेत. पालकांनाही बस चालकांची माहिती तपासून घ्यावी आणि त्यांच्या वैयक्तिक तपशिलांची नोंद ठेवावी, असा सल्ला देण्यात आला आहे. दरम्यान, जीआरमध्ये महिला बस चालकांच्या भरतीला देखील प्रोत्साहन दिले आहे.
जी पालक आपल्या मुलांना शाळेत ने-आण करण्यासाठी खाजगी वाहनांचा वापर करतात, त्यांनीही वाहन चालकाची माहिती शाळेला कळवणे आता अनिवार्य आहे. त्यानंतर शाळा प्रशासन या तपशिलांची पडताळणी करेल आणि चालक योग्य आहे कि नाही याची खात्री करेल.
हे नवीन नियम राज्यातील सर्व शाळांना लागू असतील आणि शालेय शिक्षण विभाग त्यांच्या अंमलबजावणीवर लक्ष ठेवणार आहे. विद्यार्थ्यांशी संबंधित काही गुन्हेगारीच्या घटना घडल्या होत्या त्या पार्श्वभूमीवर हा निर्णय घेण्यात आला आहे. शासनाचे उद्दिष्ट शाळकरी मुलांसाठी सुरक्षित वातावरण निर्माण करणे आहे.
