बारामती: बारामतीच्या रणांगणात (Baramati Election Result) यंदा राजकीय समीकरणांची मोठी उलथापालथ झाल्याचे चित्र समोर आले आहे. अनेक वर्षांपासून अजित पवारांचा बालेकिल्ला मानल्या जाणाऱ्या बारामतीत (Baramati News) यावेळी तब्बल सहा प्रभागांमध्ये विरोधी उमेदवारांनी विजय मिळवत (Ajit Pawar) राष्ट्रवादीला जोरदार धक्का दिला आहे. त्यामुळे शहराच्या राजकारणात मोठी खळबळ उडाली असून मतदारांनी वेगळा संदेश दिल्याची चर्चा सुरू आहे.
सर्वाधिक चर्चेचा निकाल त्या प्रभागात लागला, जिथे राष्ट्रवादीचे ज्येष्ठ नेते किरण गुजर यांचे बंधू जितेंद्र गुजर निवडणुकीच्या रिंगणात होते. या लढतीकडे भाजपपासून काँग्रेसपर्यंत सर्वांचे लक्ष लागले होते. मात्र युवा उमेदवार यशपाल सुनील पोटे यांनी अपेक्षेप्रमाणे विजय मिळवत जितेंद्र गुजर यांचा पराभव केला. हा निकाल अपेक्षित मानला जात असला तरी त्याची शहरभर जोरदार चर्चा झाली.
मात्र खरी धक्कादायक बाब इतर चार प्रभागांमध्ये समोर आली. अजित पवार गटाचे ‘निश्चित विजयाचे’ मानले जाणारे हे प्रभाग मतदारांनी उलथवून टाकले. राष्ट्रवादीच्या महिला शहराध्यक्ष अनिता गायकवाड यांना अनपेक्षित पराभव स्वीकारावा लागला. या प्रभागात अपक्ष उमेदवार संपदा बनकर यांनी विजय मिळवून आपली ताकद दाखवली.
प्रभाग क्रमांक 14 मध्ये निवडणुकीतील सर्वात चुरशीची लढत पाहायला मिळाली. सर्वोच्च न्यायालयात वकिली करणाऱ्या बहुजन समाज पार्टीच्या तरुण उमेदवार संघमित्रा काळुराम चौधरी यांनी राष्ट्रवादीच्या स्वाती आप्पासाहेब अहिवळे यांचा पराभव करत मोठी बाजी मारली. संघमित्रा यांच्या वडिलांनी यापूर्वी नगराध्यक्षपदाची निवडणूक लढवली होती, त्यामुळे या विजयाला विशेष महत्त्व प्राप्त झाले आहे.
दरम्यान, राष्ट्रवादी काँग्रेस शरदचंद्र पवार गटाच्या माजी नगरसेविका आरती शेंडगे यांनीही आपल्या प्रभागातून विजय मिळवला आहे. तसेच राष्ट्रीय समाज पक्षाच्या वनिता अमोल सातकर यांनी राष्ट्रवादीच्या पदाधिकाऱ्यांच्या मुलीचा पराभव करत वेगळी ओळख निर्माण केली.
अपक्ष उमेदवार निलेश इंगुले यांचा विजयही विशेष चर्चेत राहिला. माजी नगरसेवक असलेल्या इंगुले यांनी अपक्ष म्हणून निवडणूक लढवून राष्ट्रवादीला मोठा धक्का दिला. एकूणच बारामतीत अजित पवारांची पकड कायम असली तरी या निवडणुकीत सहा ठिकाणी मिळालेल्या फटक्यामुळे शहराच्या राजकारणाला नवी दिशा मिळाल्याचे स्पष्ट झाले आहे.
