अहमदनगर : अहमदनगर जिल्ह्यातील शिर्डी येथे एक धक्कादायक घटना घडली आहे. या घटनेनं शिर्डीसह अहमदनगर जिल्हा हादरून गेला आहे. काँग्रेस पक्षाचे शिर्डी शहराध्यक्ष सचिन चौगुलेयांच्यावर प्राणघातक हल्ला झाला आहे. संगमनेर तालुक्यातील आश्वी गावात झालेल्या शरद पवार यांच्या कार्यक्रमानंतर परतत असताना हा हल्ला झाला आहे. १० ते १२ जणांनी हल्ला केला आहे. महसूलमंत्री राधाकृष्ण विखे पाटील यांच्या शिर्डी मतदारसंघातील लोणी गावात हा हल्ला झाला आहे.
काँग्रेसचे शिर्डी शहराध्यक्ष सचिन चौगुले हे काल २ जानेवारीला सायंकाळी कार्यक्रमावरून घरी येत होते. त्यावेळी १० ते १२ जणांनी अचानक गाडी समोर आणली आणि त्यांच्यावर प्राण घातक हल्ला चढवला. राहता तालुक्यातील लोणी गावात मंगळवारी संध्याकाळच्या सुमारास ही घटना घडली आहे.
या हल्ल्यात सचिन चौगुले आणि त्यांच्याबरोबर असलेले सुरेश आरणे हे दोघे गंभीर जखमी झाले आहेत. हल्ल्यानंतर दोघांनाही संगमनेर तालुक्यातील खासगी रुग्णालयात दाखल करण्यात आलं आहे. या हल्ल्यानंतर काँग्रेस नेते बाळासाहेब थोरात यांनी चौगुले यांची हॉस्पिटलमध्ये जाऊन भेट घेतली. यावेळी हॉस्पिटलबाहेर मोठी गर्दी जमली होती.
आजची घटना ही दहशतवादी कृत्य : बाळासाहेब थोरात
आजची घटना ही दहशतवादी कृत्य असून विरोधकांचा आवाज दाबण्याचा हा प्रयत्न असल्याचा आरोप बाळासाहेब थोरात यांनी केला आहे. पोलिसांनी निपक्षपातीपणे कारवाई केली नाही, तर तीव्र आंदोलन करण्याचा इशारासुद्धा बाळासाहेब थोरात यांनी दिला आहे. नेमका हल्लेखोर कोण? हे शोधण्याचं पोलिसांसमोर आता आव्हान असून पोलीस काय कारवाई करतात, याकडे काँग्रेस पक्षाच्या कार्यकर्त्यांचं लक्ष लागलं आहे. जर योग्य कारवाई केली नाहीतर तीव्र आंदोलनाचा इशारा काँग्रेस नेते बाळासाहेब थोरात यांनी दिला आहे.
