कोल्हापूर : आदित्य ठाकरेंना सगळीकडे दौरे करू द्या. खरेतर भाजपा-सेना युती तुटण्यामागे आदित्य ठाकरेंचा मोठा वाटा होता, हे जनतेला कळत आहे. बाळासाहेब ठाकरे यांच्या विचारांपासून आदित्य ठाकरे दूर गेले आहेत. त्यामुळे आदित्य ठाकरे काँग्रेसचे काय विचार मांडतात, ते ऐकायला मिळेल. असा गौप्यस्फोट दीपक केसरकर यांनी केला आहे. ते प्रसारमाध्यमांशी संवाद साधत होते.
दरम्यान, आगामी लोकसभा निवडणुकीच्या पार्श्वभूमीवर महाविकास आघाडी आणि अन्य पक्षही आतापासूनच जोरदार तयारी करत आहे. त्याच पार्श्वभूमीवर महाविकास आघाडीतील घटकपक्ष असलेल्या शिवसेना पक्षाचे ( ठाकरे गट ) आमदार आदित्य ठाकरे ९ आणि १० जानेवारीला कोल्हापूर दौऱ्यावर येत आहेत. आदित्य ठाकरे कोल्हापूर आणि हातकणंगले लोकसभा मतदार संघात सभा घेणार आहेत. यावरून शिंदे गटातील मंत्री दीपक केसकर यांनी आदित्य ठाकरेंवर जोरदार टीका केली आहे.
दीपक केसरकर यांनी जागा वाटपावरही भाष्य केलं आहे म्हणाले, जागा वाटपाबाबतचा निर्णय वरिष्ठ घेतात. मात्र, जिथे आमचे खासदार आहेत, तिथे त्या पक्षाचं जागा लढवायच्या हे सूत्र असतं. त्याचं पालन होईल. तसेच, सिंधुदुर्ग आणि रत्नागिरी लोकसभा मतदारसंघ शिवसेनेचा आहे. त्यामुळे तिथे शिवसेनेचा उमेदवार निवडणूक लढवणार आहे, असं म्हणत दीपक केसकरांनी मंत्री रविंद्र चव्हाण यांच्याबाबत सुरू असलेल्या चर्चांना सद्यस्थितीला पूर्णविराम दिला आहे.
द शिवसेनेमध्ये झालेल्या बंडानंतर शिवसेना ठाकरे गटाचे हातकणंगले लोकसभा मतदारसंघाचे खासदार धैर्यशील माने आणि कोल्हापूर लोकसभा मतदारसंघाचे खासदार संजय मंडलिक हे ठाकरेंची साथ सोडत शिंदेंबरोबर गेले होते. विद्यमान दोन्ही खासदार शिवसेनेचे असल्याने या दोन्ही जागांवर ठाकरे गटाने आपला दावा सांगितला आहे. पण, महाविकास आघाडीच्या बैठकीत जागावाटप निश्चित करण्यात येणार आहे.
