सोलापूर : अजित पवारने आखलेला दौरा रद्द करणारा अजून जन्माला येणार आहे. मागे कोणी म्हणांल होत मी अजित पवारांचा दौरा रद्द केला. कुत्रं कस गाडीच्या खाली चालतं आणि त्याला वाटत मीच गाडी चालवतो, अरे तू गाडीची घंटा हलवतो काय? अशा शब्दात अजित पवार यांनी मुख्य प्रवक्ते उमेश पाटील यांच नाव न घेता जोरदार हल्लाबोल केला आहे. राष्ट्रवादी काँग्रेस पक्षाचे अध्यक्ष उपमुख्यमंत्री अजित पवार यांच्या नेतृत्वाखाली सोलापूर येथील मोहोळमध्ये राष्ट्रवादीची जनसन्मान यात्रा आली होती. त्यावेळी अजित पवार बोलत होते.
अजित पवार गटाचेच मुख्य प्रवक्ते उमेश पाटील यांनी ‘दादा आपसे बैर नही, राजन पाटील तेरी खैर नही’ असं म्हणत मोहोळ बंदची हाक दिली होती. याच वक्तव्यावरून उपमुख्यमंत्री अजित पवार यांनी उमेश पाटील यांच्यावर सडकून टीका केली आहे. या राड्यावरुन राष्ट्रवादीमध्येच वादाची ठिणगी पडल्याचे दिसत आहे.
तसेच प्रदेशाध्यक्ष सुनील तटकरे यांनी देखील उमेश पाटील यांना खडेबोल सुनावले आहे. ते म्हणाले पक्ष शिस्तीत चालेल बेशिस्त खपवून घेतली जाणार नाही, आमदार यशवंत माने आणि राजन पाटील यांच्यावर टीका कराल तर त्याला जागा दाखवू, असा इशारा सुनील तटकरे यांनी उमेश पाटील यांना दिला आहे.
या कार्यक्रमात बोलताना मोहोळचे आमदार यशवंत माने म्हणाले कि, मोहोळ मतदार संघात मेळाव्याचा, कार्यकर्त्यांचा वापर करून बेशिस्त वर्तन करणाऱ्याची संख्या वाढली आहे. आपल्या तालुक्यात एकच व्यक्ती आहे, जो विरोधकांशी संधान साधून माझ्यावर आणि राजन पाटील यांच्यावर टीका करत आहे, त्या व्यक्तीवर कारवाई करावी, अशी मागणी यशवंत माने यांनी व्यासपिटावर बोलताना अजित पवार यांच्याकडे केली.
