सोलापूर: सोलापूर शहरात अक्कलकोट विधानसभा मतदारसंघाचे भाजप आमदार सचिन कल्याणशेट्टी यांच्यावर हल्ला करण्यासाठी त्यांच्या वाहनचालकाला पैशांचे आमिष दाखवल्याचा धक्कादायक प्रकार समोर आला आहे. आमदारांच्या वाहनचालकाला थेट गोळ्या झाडून आमदारांना ठार मारण्याची ऑफर देण्यात आल्याचा आरोप आहे. या घटनेमुळे राजकीय आणि पोलीस वर्तुळात खळबळ उडाली आहे.
मिळालेल्या माहितीनुसार, आमदार सचिन कल्याणशेट्टी यांचे कुटुंबीय खरेदीसाठी सोलापूर शहरातील महावीर चौक परिसरात आले होते. त्यावेळी त्यांचा वाहनचालक आनंद सुरवसे हा गाडीजवळ थांबला होता. याचवेळी श्रीशैल हुळळी आणि त्याचा साथीदार फुलारी हे दोघे त्याच्याजवळ आले.
दोघांनी वाहनचालकाला पैशांचे आमिष दाखवत आमदारांवर गोळीबार करण्यास सांगितल्याचा आरोप आहे. “तुला आम्ही भरपूर पैसे देतो, तू तुझ्या आमदार दादाला गोळ्या घालून मारून टाक. यातून तुझा मोठा फायदा आहे आणि पुढचं काय ते आम्ही बघून घेऊ,” असे दोघांनी सांगितल्याचे तक्रारीत नमूद करण्यात आले आहे.
ही ऑफर ऐकून आनंद सुरवसे यांनी तात्काळ नकार दिला. त्यांनी संशयितांना याबाबत जाब विचारण्याचा प्रयत्न केला. मात्र, प्रकरण उघडकीस येण्याची भीती वाटल्याने दोघांनीही घटनास्थळावरून पळ काढला.
घटनेचे गांभीर्य लक्षात घेत आनंद सुरवसे यांनी तातडीने सदर बाजार पोलीस ठाणे गाठले. त्यांनी पोलिसांना संपूर्ण प्रकाराची माहिती देत तक्रार दाखल केली. त्यांच्या तक्रारीवरून श्रीशैल हुळळी आणि त्याचा साथीदार फुलारी यांच्याविरोधात विविध कलमांन्वये गुन्हा दाखल करण्यात आला आहे.
आमदारांच्या हत्येचा कथित कट आणि सुरक्षेशी संबंधित गंभीर प्रकार असल्याने पोलिसांनी तपासाला वेग दिला आहे. या दोघांचा नेमका उद्देश काय होता, त्यांनी हा कट कोणाच्या सांगण्यावरून रचला होता का आणि यामागे आणखी कोणी सहभागी आहे का, याचा तपास पोलिसांकडून सुरू आहे.
