अमरावती : पश्चिम विदर्भातील कृषी उत्‍पन्‍न बाजार समित्‍यांमध्‍ये तुरीचे भाव कमी झाले आहेत. तुरीचे दर गेल्या महिनाभरात दीड हजार रुपयांनी घसरले आहेत. त्यात आयात सुरु झाल्यानंतर दर आणखी कमी होतील, अशी शक्‍यता वर्तवली जात आहे. यंदा देशातील तुरीच्या उत्पादनात मोठी घट झाली आहे. त्यामुळे तुरीच्या भावात पुन्हा चांगली वाढ होऊ शकते. पण, त्‍यासाठी मार्चपर्यंत वाट पहावी लागेल, असा अंदाज अभ्यासकांनी व्यक्त केला आहे.
अमरावती कृषी उत्‍पन्‍न बाजार समितीमध्‍ये तुरीचे भाव नोव्हेंबर महिन्यात सरासरी १० ते ११ हजार रुपये प्रति क्विंटलच्या दरम्यान होते. पण मागील तीन आठवड्यांमध्ये तुरीच्या भावात सतत घट होत गेली. सध्या तुरीला सरासरी ८ हजार ५०० ते ९ हजार रुपयांच्या दरम्यान भाव मिळत आहे. अमरावती कृषी उत्‍पन्‍न बाजार समितीत शुक्रवारी तुरीला सरासरी ८ हजार ४५० रुपये प्रति क्विंटल दर मिळाला. शनिवारी सरासरी ८ हजार ५०० रुपये भाव मिळाला. अकोला बाजार समितीतही दर गेल्या आठवडाभरापासून ८ हजार ५०० रुपयांवर स्थिर आहेत.
देशातील बाजारातील तुरीची आवक मार्च महिन्यापर्यंत जास्त राहू शकते, असा अंदाज आहे. मार्च महिन्यानंतर बाजारातील आवक कमी होत जाईल. त्यामुळे दराला आधार मिळू शकतो. मार्चनंतर बाजारात सुधारणा होऊ शकते, असा अंदाज तूर बाजारातील अभ्यासकांनी व्यक्त केला. सर्व भीस्त नव्या मालावरच राहील. बाजारातील आवक कमी झाल्यानंतर तुरीच्या भावात तेजी येऊ शकते. यंदा तुरीला १० हजार रुपये प्रति क्विंटल दर मिळावा, अशी अपेक्षा शेतकरी ठेवून आहेत.
