अमरावती: अमरावती जिल्हा स्त्री रुग्णालयातील नवजात शिशू अतिदक्षता कक्षात (SNCU) सोमवारी पहाटे अचानक आग लागल्याने मोठी दुर्घटना घडली. या घटनेत 3 नवजात बालकांचा दुर्दैवी होरपळून मृत्यू झाला. आगीच्या वेळी कक्षात 12 बाळांवर उपचार सुरू होते. त्यापैकी 6 बाळांना डॉक्टर, परिचारिका आणि रुग्णालयातील कर्मचाऱ्यांनी तातडीने बाहेर काढले. काही बाळांची प्रकृती गंभीर असून त्यांच्यावर शेजारील सुपरस्पेशालिटी रुग्णालयात उपचार सुरू आहेत.
प्राथमिक माहितीनुसार, व्हेंटिलेटरमध्ये स्फोट झाल्यानंतर आग लागल्याचे सांगितले जात आहे. काही क्षणांतच आगीने गंभीर स्वरूप धारण केले आणि कक्षात मोठ्या प्रमाणात धूर पसरला. त्यामुळे बचावकार्य करताना कर्मचाऱ्यांसमोर मोठे आव्हान निर्माण झाले.
या परिस्थितीत ड्युटीवर असलेल्या दोन परिचारिकांनी धाडस दाखवत बाळांना सुरक्षित ठिकाणी हलवण्यास सुरुवात केली. स्वतःच्या जीवाची पर्वा न करता त्यांनी कक्षातील बाळांना बाहेर काढले. बचावकार्यादरम्यान दोन्ही परिचारिकांच्या हातांना भाजल्याची माहिती समोर आली आहे.
अमरावती जिल्हा स्त्री रुग्णालयाच्या तिसऱ्या मजल्यावर 3 नवजात शिशू अतिदक्षता कक्ष आहेत. प्रत्येक कक्षाची क्षमता 13 बालकांची असून एकूण 39 बाळांवर उपचार करता येतात. यापैकी एका कक्षात ही आग लागली होती.
दरम्यान, आगीत कक्षातील एसीसह इतर उपकरणे आणि साहित्य जळून खाक झाले. विशेष म्हणजे, रुग्णालयाची नवीन इमारत अवघ्या वर्षभरापूर्वी सुरू झाली होती. त्यामुळे आग लागल्यानंतर अग्निरोधक यंत्रणा प्रभावीपणे का कार्यान्वित झाली नाही, असा प्रश्न उपस्थित होत आहे. तसेच स्फोट नेमका कशामुळे झाला, याचे कारण अद्याप स्पष्ट झालेले नाही. या घटनेत मृत्यू झालेल्या बालकांमध्ये पूजा बोरगे यांचा मुलगा, गायत्री प्रफुल चोपडे यांचा मुलगा आणि किरण बेठेकर यांची मुलगी यांचा समावेश आहे.
