Buldhana News : बुलढाण्यातून एक अपघाताची बातमी समोर येत आहे. दुचाकीच्या भीषण अपघातात दोघांना आपला जीव गमवावा लागला आहे. बुलढाण्यातील मलकापूर तालुक्यातील पिंपरी गवळी रस्त्यावरील दाभाडी फाट्याजवळ दुचाकीच्या अपघाताची घटना घडली आहे. अपघातात दोन जणांचा जागीच मृत्यू झाला असून एक जण गंभीर जखमी झाला आहे. शनिवारी रात्रीच्या सुमारास हा अपघात घडला आहे.
या अपघातात दुचाकीवरील दोन जण जागीच ठार झाले असून एक जण गंभीर जखमी झाला आहे. दुचाकीस्वार शेख रशीद शेख कालू (वय ५५ ), शेख अमीन शेख हनिफ (वय ४७), सलीम खा बुढन खा (वय ३०) हे तिघे मलकापूर येथून मिस्त्री काम करून आपल्या गावी माकोडीकडे परत येत होते.
दरम्यान दाताळा पिंपरी गवळी रोडवरील दाभाडी येथे अज्ञात वाहनाने त्यांच्या दुचाकीला जोरदार धडक दिली. यामध्ये शेख अमीन शेख हनिफ, शेख रशीद शेख कालू यांचा मृत्यू झाला. तर सलीम खा बुढन खा हा जखमी झाला आहे. तर जखमीला मलकापूर येथील खाजगी रुग्णालयात दाखल करण्यात आले असून त्याच्यावर उपचार सुरू आहेत.
