Bhandara Accident : भंडारा : शहरातील राजीव गांधी चौकात झालेल्या अपघातात एका गरोदर महिलेचा दुर्देवी मृत्यू झाला आहे. भरधाव टिप्परने दुचाकीला धडक दिल्यामुळे अपघात झाला. यामुळे अपघातात दुचाकीवरील गर्भवती महिलेचा दुर्दैवी मृत्यू झाला. तर एकजण गंभीर जखमी झाला आहे. जखमीवर जवळील रुग्णालयात उपचार सुरु आहे. या अपघातानंतर संतप्त नागरिकांकडून टिप्परची तोडफोड करण्यात आली.
मिळालेल्या माहितीनुसार, बहिणीसोबत घराकडे जाणाऱ्या भावाच्या दुचाकीला भरधाव आलेल्या टिप्परने जोरदार धडक दिली. या भीषण अपघातात दुचाकीवरील गरोदर बहिणीचा घटनास्थळीच दुर्दैवी मृत्यू झाला. तर, भाऊ गंभीर जखमी झाला. ही घटना शुक्रवारी रात्री 10.30 वाजताच्या सुमारास घडली. अपघाताची माहिती होताच नागरिकांनी घटनास्थळी एकच गर्दी केली. संताप व्यक्त करताना रास्तारोको करीत वाहतूक थांबवून रोष व्यक्त केला. यावेळी संतप्त नागरिकांनी टिप्परची तोडफोड करीत पेटवण्याचा प्रयत्न केला.
भंडारा पोलिसांनी तात्काळ घटनास्थळ गाठत नागरिकांना टिप्पर पेटवण्यापासून रोखले. भंडारा पोलिसांनी जमावाला शांत केल्यामुळे मोठी दुर्घटना टळली आहे. अफसाना शेख (30) असे मृतक गरोदर महिलेचे नाव आहे. तर, कलीम शेख (35) असे गंभीर जखमी भावाचे नाव आहे. सुमारे दीड तासानंतर नागरिकांचा रोष शांत झाल्यानंतर वाहतूक पूर्ववत सुरू झाली. घटनेचा अधिक तपास भंडारा पोलीस करत आहे. या घटनेमुळे परिसरात हळहळ व्यक्त करण्यात येत आहे. one seriously injured
