यवतमाळ : महागाव तालुक्यातील फुलसावंगी येथे तान्हा पोळ्यानिमित्त भरलेल्या यात्रेत एका महिलेचा भीषण अपघात झाला. पुणेश्वर मंदिराच्या परिसरात आयोजित यात्रेत आकाश पाळण्यात बसलेल्या महिलेचे केस अचानक पाळण्याच्या फिरत्या बेरिंगमध्ये अडकले. पाळणा सुरू असल्याने केस जोरात ओढले गेले आणि त्यांच्या डोक्याला गंभीर दुखापत झाली. या घटनेमुळे यात्रेत काही काळ गोंधळाचे वातावरण निर्माण झाले.
या अपघातात बाली मारोती टाळीकोटे या गंभीर जखमी झाल्या आहेत. तान्हा पोळ्याच्या निमित्ताने आयोजित यात्रेत त्या आल्या होत्या. आकाश पाळण्यात बसल्यानंतर काही वेळाने पाळणा सुरू करण्यात आला. तो वेगाने फिरत असताना अचानक त्यांचे केस बेरिंगमध्ये अडकले.
केस अडकल्यानंतर काही क्षणांतच केस जोराने ओढले गेले. त्यामुळे त्यांच्या डोक्याची चामडी निघून गंभीर जखम झाली. हा प्रकार लक्षात येताच पाळण्यात बसलेल्या इतर नागरिकांसह उपस्थितांनी तातडीने मदत करण्यास सुरुवात केली. आरडाओरड झाल्यानंतर पाळणा त्वरित थांबवण्यात आला.
यानंतर नागरिकांनी जखमी महिलेला आकाश पाळण्यातून बाहेर काढले. डोक्याला मोठी दुखापत झाल्याने त्यांना विलंब न करता उपचारासाठी पुसद येथील खासगी रुग्णालयात दाखल करण्यात आले. त्यांच्यावर वैद्यकीय उपचार सुरू आहेत. यात्रेत झालेल्या या धक्कादायक घटनेमुळे काही काळ भीतीचे वातावरण निर्माण झाले होते.
