अकोला : अकोल्यामधून माणुसकीला काळिमा फासणारी घटना समोर आली आहे. मुक्या प्राण्याला क्रूरतेने मारहाण करण्याचा प्रकार उघड झाला आहे. सोनू देशमुख नावाच्या एका व्यक्तीनं शेजारच्या घरातला कुत्रा आपल्या घरासमोर भुंकतो म्हणून त्याचे चक्क डोळे फोडत त्याला अमानुष मारहाण केली आहे. देशमुखने इतर चार जणांच्या मदतीने कुत्र्याला हॉकी स्टीक आणि काठीने अमानुष मारहाण केली आहे. या मारहाणीत कुत्र्याचे डोळे फोडून त्याचा जबडा आणि इतर ठिकाणी फ्रॅक्चर करण्यात आल्याची माहिती मिळत आहे. याप्रकरणी संशयित आरोपी सोनू देशमुखसह इतर चौघांवर रामदासपेठ पोलिसांत गुन्हे दाखल करण्यात आला आहे. या घटनेने परिसरात एकच खळबळ उडाली आहे.
लाठी-काठीनं बेदम मारहाण..
अकोल्यातील तापडियानगर भागातील मोहन भाजी भंडारजवळ घडलेल्या एका घटनेनं खळबळ उडाली असून हि घटना म्हणजे माणुसकीला काळिमा फासणारी आहे. येथील रहिवासी असलेल्या सुनिता सोनोने या महिलेकडे साधारणत: पाच वर्षाचा पाळीव कुत्रा आहे. शेजारीच राहणाऱ्या सोनू देशमुख याने कुत्र्याचा सततच्या भुंकण्याचा आवाज कानावर पडतो म्हणून कुत्र्यासोबत भयंकर कृत्य केलं आहे. चार जणांच्या मदतीने त्याने क्रूरतेने कुत्र्याचे हातपाय बांधले. पुढं लाठी-काठीनं बेदम मारहाण केलीय. कुत्र्याचे दोन्ही डोळे फोडण्यात आलेय. त्यानंतर या कुत्र्याला बांधलेल्या अवस्थेत कचऱ्याच्या गाडीत टाकून दिले. या संपूर्ण प्रकरणात अकोल्यातील पशूप्रेमींनी पोलीस तक्रार दाखल केली आहे. रामदास पेठ पोलिसांनी यात गुन्हे दाखल केला आहे.
दरम्यान, मारहाण केलेल्या या कुत्र्यावर अकोल्यातील डॉ. पंजाबराव देशमुख कृषी विद्यापीठातील पशुवैद्यकीय रुग्णालयात उपचार सुरू आहे. मात्र मारहाणीत कुत्र्याचे दोन्ही डोळे निकामी झाले असून कंबरही फ्रॅक्चर झाली आहे.
