तुमसर (भंडारा): शेगाव येथे कुटुंबासह देवदर्शनासाठी गेले असता अज्ञात चोरट्यांनी १ लाख ४० हजार रुपयांचा ऐवज चोरून नेल्याची घटना स्टेशन टोली देव्हाडा येथे घडली. सूर्यकांत सदाशिव कारेमोरे (रा. स्टेशन टोली देव्हाडी, ता. तुमसर) हे त्यांच्या दाराला कुलूप लावून सहकुटुंब शेगाव येथे दर्शनाला गेले होते. यादरम्यान संधी साधून अज्ञात चोरट्याने त्यांच्या समोरील दाराचे कुलूप तोडून आत प्रवेश केला.
बेडरूममधील गोंदरेज कपाट तोडून लॉकरमधील सोन्याचा गोप, सोन्याची अंगठी, कानातील सोन्याचे झुमके, सोन्याची काळी पोत, कानातले सोन्याची रिंग व रोख असा एकूण एक लाख ४० हजार रुपयांचा ऐवज चोरून नेला. याप्रकरणी पोलिसांनी तुमसर पोलीस स्टेशन येथे अज्ञात आरोपीविरुद्ध गुन्हा नोंद केला. पुढील तपास पोउपनि. पाटील करीत आहेत.
