नागपूर : विमान कंपन्या आणि रेल्वेमध्ये स्फोट होणार असल्याची भीती असल्याचे अनेक ई-मेल पोलिसांना पाठवण्यात आले होते. याप्रकरणी पोलिसांनी ई-मेल पाठवणाऱ्या आरोपीला अटक केली असून त्याने ईमेल करण्यासाठी वापरलेले कॉम्प्युटर आणि इतर डिवाइस ही पोलिसांनी जप्त केले आहेत. जगदीश उईके असं अटक करण्यात आलेल्या आरोपीचे नाव आहे. आरोपी जगदीश उईकेकडे तपास केला असता त्याने एक-दोन नव्हे, तर तब्बल 36 ईमेल पाठवल्याचे सांगितले.
सध्या नागपूर पोलिसांचे सायबर सेल त्या सर्व डिवाइसचा ॲनालिसिस करत असून त्याच्यातून आणखी काही माहिती समोर येण्याची शक्यता असल्याचे नागपूरचे पोलीस आयुक्त रवींद्र सिंगल यांनी सांगितले आहे. दरम्यान, जगदीश उईके तपासात सहकार्य करत नसून वारंवार वेगवेगळी माहिती देऊन पोलिसांची दिशाभूल करण्याचा प्रयत्न करत असल्याचे देखील पोलिसांनी सांगितले आहे.
पोलीस आयुक्त म्हणाले, जगदीश उईकेने काही वर्षांपूर्वी “आतंकवाद एक तुफानी राक्षस” नावाचे पुस्तक लिहिलं होतं. ते पुस्तक प्रकाशित व्हावं, यासाठी त्याने हे ईमेल केल्याचे तो तपासात सांगत आहे. मात्र, पोलिसांचा त्याच्या या थेअरीवर विश्वास नसून नागपूर पोलिसांसह इतर एजन्सीस जगदीश उईकेचा सखोल तपास करत आहेत.
पोलिसांनी दिलेल्या अधिक माहितीनुसार, जगदीश उईके हा गोंदिया जिल्ह्यातील मोरगाव तालुक्यातील ताडगाव येथील रहिवासी आहे. मात्र, 2016 पासून तो गोंदिया सोडून गेलेला होता. उईकेने गोंदियामधील त्याचे घरही विकले होते. तसेच तो आपल्या आई-वडिलांसोबतही राहत नव्हता. 2016 पासून तो कुठे होता, याबाबत स्पष्ट माहिती मिळाली नाही. जगदीश उईकेने गेल्या काही दिवसात विमान कंपन्या, वेगवेगळे विमानतळ आणि रेल्वेला धमकीचे ईमेल पाठविले आहेत.
दरम्यान, धमकीचे ईमेल आल्यानंतर विविध विमानतळावर तपासणी आणि कडेकोट सुरक्षा व्यवस्थेमुळे अनेक विमानाच्या उड्डाणाला उशीर होऊन विमान कंपन्यांचे कोट्यवधींचे नुकसान झाले होते. अशाच आशयाचे ई-मेल रेल्वेमंत्री यांच्यासह रेल्वे प्रोटेक्शन फोर्स आणि रेल्वेशी संबंधित अनेक कार्यालयांमध्ये पाठविले होते. एक टेरर कोड डी कोड करण्यात आला असल्याचा दावा त्या ई-मेलमध्ये पुढील पाच दिवसात देशातील विविध रेल्वे स्टेशन आणि रेल्वे विभागाच्या परिसरात 30 पेक्षा जास्त स्फोट होतील, असा आशय नमूद केला होता.
