अमरावती : राष्ट्रवादीचे सर्वेसर्वा शरद पवार आणि आमदार बच्चू कडू यांच्यात अमरावती येथे भेट झाली. जवळ-जवळ 15 ते 20 मिनिटं दोन्ही नेत्यांमध्ये चर्चा झाली. शरद पवार हे सध्या दोन दिवसांच्या अमरावती दौऱ्यावर आहेत. या दौऱ्यावर असताना बच्चू कडू यांनी शरद पवारांना घरी येण्याचे आमंत्रण दिले होते. मात्र या भेटीचे आमंत्रण दिल्यापासून चर्चांना उधाण आले होते. या भेटीमुळे अनेक राजकीय तर्कवितर्क लावले जात असून चर्चेला जोर मिळाला आहे.
बच्चू कडू काय म्हणाले ?
बच्चू कडू म्हणाले की, शरद पवार यांच्यासोबत थोडी राजकीय आणि सामाजिक चर्चा झाली. मात्र या भेटी दरम्यान सर्वाधिक चर्चा ही शेतीवर झाली. पेरणी ते कापणीपर्यंत सगळी कामे ही रोजगार हमी योजनेत व्हायला हवेत. ही बाब तुमच्या अजेंड्या मध्ये असायला हवी, असे मी त्यांना सुचवले, असल्याचं बच्चू कडू म्हणाले. त्याशिवाय, आमच्यात राजकीय चर्चा झाली नाही, मात्र समजा जर ती, झाली असेल तरी तुम्हाला सांगायचं काही कारण नाही, असे बच्चू कडू म्हणाले. बऱ्याच गोष्टी उघड करायच्या नसतात. शिंदेसाहेब जोपर्यंत मुख्यमंत्री आहे, तोपर्यंत मी कुठेही जाणार नाही. अजून आकाशात ढगच आले नाही, ढग येउद्या मग पाहू, अशा मिश्किल शब्दात त्यांनी आपली प्रतिक्रिया देत या भेटीतील गुप्तता पाळली.
भेटीबाबत शरद पवार काय म्हणाले ?
भेटीबाबत शरद पवार म्हणाले की, सध्या मी दोन दिवसांच्या अमरावती दौऱ्यावर आहे. म्हणून बच्चू कडू यांनी मला चहा घेण्यासाठी घरी येण्याचे आमंत्रण दिले होते. “मी बच्चू कडूंच्या घरी जातोय, त्यात काहीही राजकीय हेतू नाही. एका विधानसभेच्या सदस्यानं चहासाठी बोलावलं, तर एवढी चर्चा करण्याची गरज नाही.” असं सांगत शरद पवारांनी राजकीय शक्यतांना पूर्णविराम दिला आहे. ncp-chief-leader-sharad-pawar-meet-bachhu-kadu-at-amravati-maharashtra-politics-marathi-news
