पुणे : हृदय पिळवटून टाकणारा अपघात पु्ण्यातील मंतरवाडी-कात्रज बायपास रस्त्यावर घडला आहे. एका डंपरने अॅक्टिव्हाला मागून जोरदार धडक दिली, यामध्ये चिमुरड्याचा जागीच मृत्यू झाला, तर आई गंभीर जखमी झाली आहे. आईच्या डोळ्यांसमोरच डंपरने चिमुकल्याला चिरडले अन् आईने फोडलेला टाहो आसमंत व्यापून गेला… बुधवारी सायंकाळच्या सुमारास हडपसरमध्ये ही घटना घडली. जखमी आईला उपचारासाठी जवळील रुग्णालयात दाखल करण्यात आले आहे. ही घटना पाहणारा प्रत्येकजण हळहळ व्यक्त करत होता. अपघात झाल्यानंतर डंपर चालकाने पळ काढल्यामुळे संतप्त जमावाने डंपर पेटवून दिला. पोलिसांनी या घटनेची माहिती मिळताच घटनास्थळावर धाव घेतली. चालकाविरोधात गुन्हा दाखल केला आहे.
पु्ण्यातील मंतरवाडी-कात्रज बायपास रस्त्यावर भरधाव वेगाने येणाऱ्या डंपरने अॅक्टीव्हा स्कुटरला धडक दिली. या स्कुटरवर शौर्य सागर आव्हाळे (वय वर्षे ८) हा आईसोबत जात होता. पण डंपरच्या धडकेने तो रस्त्यावर पडला. आईसमोरच डंपरने मुलाला चिरडले आणि शौर्यचा जागीच मृ्त्यू झाला. आईच्या डोळ्यांसमोर चिमुकल्याच्या अंगावरून डंपर गेला. त्यामुळे शौर्यच्या आईने टाहो फोडला. अपघातानंतर शौर्य आव्हाळे याचा मृतदेह पोस्टमार्टेमसाठी ससून रुग्णालयात पाठवण्यात आला.
डंपर चालकाने गाडी बाजूला लावली आणि गाडी सोडून पळून गेला. अपघातानंतर उपस्थितीत जमावाने आणि मृत मुलाच्या नातेवाईकांनी डंपरला आग लावली. याबाबत माहिती प्राप्त झाल्यानंतर घटनास्थळी पोलीस पथक दाखल झाले. त्याशिवाय अग्निशामन दलही पोहचले. पोलिसांनी लोकांना पांगवल्यानंतर अग्निशामन दलाने आग विझवली. घटनास्थळावर पळ काढणाऱ्या डंपर चालकाला पोलिसांनी तत्काळ ताब्यात घेतले. डंपर पेटवल्यामुळे परिसरात धुराचे लोळ उसळले. डंपरने पेट घेतल्यानंतर आगीच्या ज्वाळा आणि धूर लाईटच्या तारांना लागत असल्याने तत्काळ वीजपुरवठा खंडीत करण्यात आला. त्यामुळे मोठी दुर्घटना टळली.
