नागपूर: नागपूरमध्ये कौटुंबिक (Nagpur Crime) वादातून नात्याचे भयावह (Nagpur News) रूप समोर आले आहे. पारडी पोलिस ठाण्याच्या हद्दीत झालेल्या या घटनेने परिसरात मोठी खळबळ उडाली आहे. नात्यातील गुंतागुंत आणि मनातील संताप यामुळे पुतण्याने स्वतःच्या काकाचा निर्घृण खून केला आहे. ही घटना गुरुवारी तलमले वाडी परिसरात घडली. मृतकाचे नाव गोमा कृष्णराव कुंभारे (वय 42, रा. गंगाबाग कॉलनी, पारडी) असे असून आरोपी पुतण्याचे नाव कुणाल देवेंद्र कुंभारे (वय 22, रा. नाईक तलाव, पाचपावली) असे आहे.
पोलिसांनी दिलेल्या माहितीनुसार, आरोपी कुणालच्या आईने आपल्या पतीच्या भावाशी म्हणजेच दिराशी विवाह केला होता. गोमा कुंभारे हे त्याच कुणालच्या आईचे दुसरे पती म्हणजेच त्याचे काका होते. या घटनेमुळे कुणालच्या मनात तीव्र संताप निर्माण झाला होता. वडिलांसोबत राहत असलेल्या कुणालला असे वाटत होते की काकामुळे त्याचे घर उद्ध्वस्त झाले. त्यामुळे तो अनेकदा गोमा कुंभारे यांच्याशी वाद घालत असे आणि त्यांना “तुला पाहून घेईन” अशी धमकीही देत असे.
गुरुवारी दुपारी दोघांमध्ये पुन्हा वाद झाला. त्यानंतर सायंकाळी कुणाल आपल्या मित्र अमित भारती याच्यासोबत पारडी परिसरात गेला. काका घरात नसल्याचे लक्षात येताच तो थेट तलमले वाडी परिसरात गेला, जिथे गोमा कुंभारे काही कामानिमित्त गेले होते. तिथे पोहोचून दोघांमध्ये पुन्हा वाद झाला आणि क्षणभराच्या रागाच्या भरात कुणालने चाकू बाहेर काढून काकाच्या छाती, मान आणि पोटावर सलग वार केले. या हल्ल्यात गोमा कुंभारे जागीच कोसळले आणि त्यांचा मृत्यू झाला.
घटनेची माहिती मिळताच पारडी पोलिस तात्काळ घटनास्थळी दाखल झाले. त्यांनी गोमा कुंभारे यांना भवानीनगर रुग्णालयात दाखल केले, मात्र डॉक्टरांनी त्यांना मृत घोषित केले. वरिष्ठ पोलीस निरीक्षक नंदा मनगटे यांच्या मार्गदर्शनाखाली घटनास्थळी पंचनामा करण्यात आला आणि मृतदेह मेयो रुग्णालयात पाठविण्यात आला.
घटनानंतर आरोपी कुणाल आणि त्याचा मित्र अमित भारती दोघेही फरार झाले होते. पोलिसांनी तत्काळ शोधमोहीम राबवत त्यांना अटक केली असून पुढील तपास सुरू आहे. या घटनेने परिसरात भीतीचे वातावरण निर्माण झाले असून, नातेसंबंधातील वैयक्तिक राग आणि गुंतागुंतीमुळे घडलेली ही हत्या समाजाला हादरवून टाकणारी ठरली आहे.
