इंदापूर: पुणे जिल्ह्यातील इंदापूर तालुक्यात माणुसकीला काळिमा फासणारी घटना समोर आली आहे. उद्धट गावाच्या हद्दीतील एका निर्जन ओढ्याजवळ नवजात पुरुष अर्भक बेवारस अवस्थेत आढळले. रात्रीच्या वेळी बाळाच्या रडण्याचा आवाज ऐकून एका नागरिकाने घटनास्थळी धाव घेतली. त्यानंतर गवतात पडलेल्या या चिमुकल्याला सुरक्षित बाहेर काढून तातडीने उपचारासाठी नेण्यात आले. या नागरिकाच्या प्रसंगावधानामुळे बाळाचा जीव वाचण्यास मदत झाली.

ही घटना 13 नोव्हेंबर रोजी रात्री साडेआठच्या सुमारास घडली. उद्धट गावातील विशाल गायकवाड यांच्या प्लॉटिंगसमोरील ओढ्यातून लहान बाळाच्या रडण्याचा आवाज येत होता. हा आवाज ऐकल्यानंतर सुभाष इंगोले यांनी त्या दिशेने जाऊन पाहिले. त्यावेळी त्यांना गवतात एक नवजात बाळ अत्यंत असुरक्षित अवस्थेत पडलेले दिसले.
बाळाला अशा परिस्थितीत पाहताच इंगोले यांनी वेळ न घालवता त्याला उचलले. थंडीपासून संरक्षण मिळावे म्हणून स्वतःच्या कपड्यांमध्ये गुंडाळून त्यांनी बाळाला सुरक्षित केले. त्यानंतर तातडीने बारामती येथे नेऊन त्याच्यावर प्राथमिक उपचार करण्यात आले.

या घटनेची माहिती मिळताच संबंधित नागरिकांनी वालचंदनगर पोलिसांशी संपर्क साधला. पोलिसांना संपूर्ण प्रकार सांगून पुढील कारवाईसाठी माहिती देण्यात आली. नवजात बाळाला अशा प्रकारे निर्जन ठिकाणी सोडून दिल्याने परिसरात चिंता आणि संताप व्यक्त केला जात आहे.

दरम्यान, या बाळाला कोणी आणि कोणत्या कारणामुळे येथे सोडले, याचा तपास वालचंदनगर पोलीस करत आहेत. बाळाच्या पालकांचा शोध घेण्याचे कामही सुरू आहे. एका नागरिकाने वेळीच मदत केल्यामुळे एका नव्या जीवाला सुरक्षितता मिळाली आहे.






