नागपूर : चालत्या दुचाकीवर एसी कुलींग सिलेंडर फुटल्याची धक्कादायक घटना घडली आहे. या घटनेत जखमी झालेल्या मेकॅनिकचा मृत्यू झाला आहे. वाडी पोलीस ठाण्याच्या हद्दीत ही घटना घडली आहे. योगेश ज्ञानेश्वर तांडेवार (वय-२७, सोनबानगर, वाडी) असे मृत्यू झालेल्या मेकॅनिकचे नाव आहे. ही घटना ५ जून रोजी दुपारी तीन वाजण्याच्या सुमारास घडली.
याबाबत अधिक माहिती अशी की, त्रिमूर्ती नगर येथील डाईकिन कंडिशनर प्रायव्हेट लिमिटेड या कंपनीत योगेश तांडेवार हे काम करत होते. तो एअर कंडिशनमध्ये एसी कुलिंग गॅस भरण्याचे काम करायचा. ५ जून रोजी दुपारी तीन वाजताच्या सुमारास तांडेवार हा कंपनीतीलच सुधीर हाडगे सोबत दुचाकीने निघाला. त्याने एसी गॅस कुलिंग सिलेंडर दुचाकीवर पायाजवळ ठेवले होते.
वडधामना संगम मार्गाजवळून जात असताना अचानक सिलेंडर फुटला आणि त्यामध्ये दोघेही गंभीर जखमी झाले. त्यांना उपचारासाठी शालिनीताई मेघे हॉस्पिटलमध्ये नेले असता डॉक्टरांनी योगेशला मृत घोषित केले. सुधीरवर उपचार सुरू आहेत. कुणाल मनगटे यांच्या सूचनेवरून वाडी पोलीस ठाण्यात अकस्मात मृत्यूची नोंद करण्यात आली आहे.
